Merkezê Çapemenîye yê QSDyî derheqê kedkarê Çapemenîya Azade Egîd Rojî de eşerayîye daye û nê vatî:

''Artêşa tirke ya îşxalkere û çeteyê ci hêrişê xo yê vera Rojawanî domnenê ke waranê xo yê îşxalî hîra bikerê. Ne semedî ra herêma Tişrînî ke semedê ci her hetî ra muhîmî o hedef genê. Hêzê ma û şarê ma 2 menganî ra zafê o vera hêrişan xoverdayîşê tarîxî kenê û hêrişan betal kenê. Xeyrê kedkaranê Çapemenîya Azade heme dinya xoverdayîşê hêzanê ma û şarê vînena. Dewleta tirke ya îşxalkere seba ke binkewtişê xo binimno tim rojnameran hedef gena.

Tewr peynî de 15ê sibate de rojnameger Egîd Roj ( Şervan Sîdo) Awbendê Tişrînî de hetê teyarayanê dewleta tirke ame hedefgirewtene û şehîd bi. Rojnamegerê sey Nazim, Cihane û Egîdî xoverdayîşê awbendî de bîyî çim û goşê şarê ma û binkewtişê şerê taybetî yê dewleta tirke rolo gird kay kerd.

 Bi nê hêrişî ke çapemenîye ameye hedefgirewtene ame waştene ke şarê ma biterso, paştî bidîyo çeteyan û xoverdayîşê Tişrînî bibo zehîf. La wa na raştîye bêra zanayeneke şarê ma nizdê hîrê mengan o rixmê heme hêrişan awbend de xoverdayîşê xo domneno. Çeteyî tersî ra warê şerî ra remenê. Xoverdayîşê Awbendê Tişrînî her wextî ra hêzdar o. Bêşik qehremanê sey Egîd Rojî seba ke nê xoverdayîşî bidê eşnawiten keda pîle daye.

Egîd Roj keyeyêk welatperwerî yê Efrînî de yeno dinya ke zaf şehîdê ci est ê. Ciwanîye xo de  2012 de tewrê falîyetanê şorişî beno û wextêk xebatanê pawitişî de ca geno. Dima ra tewrê xebatanê çapemenîye beno û sey xebatkarê Çapemenîya Azade xeylê wext falîyet rayra beno. 

Egîd Roj şeranê Efrîn, Şehba û Helebî de keda pîle dano. 2018 de hêrişê îşxalî yê vera Efrînî de 2 mengî cepheyê şerî de maneno.  Tewr peynî de Awbendê Tişrînî de çalakîyanê sîvîlan teqîp keno û yeno hedefgirewtene. Egîd Rojî sey şervanêkî heme cepheyanê şerî, her mewzîya Şorişê Rojawanî de ca geno û xoverdayîşî resneno rayapêroyîye.  Egîd Roj sey kedkarê Çapemenîya Azade heqîqetî teqîp keno û coka beno hedefê dewleta tirke.

Ma veng danê heme sazgeh û dezgehanê mîyanneteweyîyî ke wezîfeyê înan pawitişê rojnamegeran o, wa vera sûcê qetilkerdişê rojnamegeran bêveng memanê. Ma hemrayê xo Egîd Rojî bi hurmet yad kenê, keyeyê ci û şarê xo rê serweşîye wazenê. Ma soz danê ke ma do rayîrê ey de dewam bikerê û wayîrê xeta Çapemenîya Azade bivejê.''