Îstanbul, Îzmîr û Anqara de bi hezaran cinîyî tewrê rayraşîyayîşê şewe yê femînîstan bîyî û wina qîrayî: ''Ma pê hêzê femînîzmî sere wedarenê û wayîrê cuya xo vejîyenê.''

Îstanbul de polîsan meydanê Taksîmî girewt binê ablûqa. Cinîyî kuçeyê Siraselvîlerî de verê Komeleya Heqanê Merdiman de ameyî yewca û rayîrî ra şîyî. Hemsereka HDPyî Pervîne Buldan û wekîlê HDPyî zî vernîya kortejî de bîyî. Rayraşîyayîş de cinîyan sloganê sey 'Cinîye, Cuye, Azadîye', 'Ti do teyna nêmane', 'Kiştişê cinîyan polîtîk ê' vatî.

Cinîyan govend girewt, meşaleyî kirişti. Emser Hetkara Serekê Partîya Şorişgêre Burcugule Çubuka ke kelemçeyo elektronîk red kerd, eşkerayîye wende. Çubuke vat: ''Patrîyarka her ca de kena ke ma ser o serdest biba. Femînîzm hêz dano ma ke ma vajê nê, wayîrê beden, ked û cuya xo vejîyê.''

Karakoy de tay cinîyan xîret kerd ke barîkatê polîsan ra derbaz bibê. Cinîyan soz da ke 2022 de Taksîm de do rayîrî ra şorê.

Îzmîr de zî bi beşdarîya Wekîla HDPyî Serpîle Kemalbey cinîyan rayraşîyayîşê şewe yê femînîstan ard ca. Cinîyan sloganê sey 'Cinîye, Cuye, Azadîye', 'Gulîstane Doku ça de ya' vatî û dowîzê sey 'Xopawitiş heq o', 'Hemserekîye xeta ma ya mor a' 'Ma xo pawenê' akerdî.

Mayê Haştîye pê kincanê xo yê herêmîyan tewrê rayraşîyayîşî bîyî. Eşkerayîya kurdkî hetê Jîyane Akin ra ameye wendene. Eşkerayîye de ame waştene ke Peymana Îstanbulî bêkêmî bêra caardene.

Rayraşîyayîşê şewe yê femînîstan ê Anqara de cinîyî kuçeyê Sakarya de ameyî pêser. Polîsan nêverda cinîyê transî derbazê herême bibê. Cinîyan dowîzê sey 'Xoverdayîşê cinîyan mîrasê cinîyan o', 'Biciwîyo 8ê Adare', 'Cinîyî kuçe de yê, femînîzm seredaritiş de yo' kiriştî.

Govendan ra dima Beste Yorulmaz nameyê cinîyan ser o eşkerayîya kurdk, tirkî, erebkî wende. Beste pare kerd ke pandemî de cinîyî bêkar mendî, keyeyan de maruzê şîdetî mendî û nika zî xeylêk cinîyî hedefê dewlete de yê. Beste vat: ''Ma yewbînan ra femînîzmî ra hêz gênê. Pê serewedaritişê femînîzmî partîarka do birijîya.''

Cinîyî rixmê astengîya polîsan zî heta kuçeyê Yukselî pê sloganan şîyî.