Rêxistinanê cinîyan ê Rojawanê Kurdîstanî bi şîarê 'Vera qirkerdişê cinîyan ma cuya azade biafernê' Reqa de Salona Konferansî ya Zanîngehê Şerqî de forumêk viraşt. Forumê cinîyan ê Reqa yo ke seba paştdayîşê bi cinîyan ê êzidîyan û afganan ame kerdene, temsîlkarê YPJyî, Kongra Star, Yewîya Cinîyan ê Êzidîyan, Jineolojî, Komelê Cinîyan ê Zenûbya, partîyanê sîyasîyan, Meclîsê Cinîyan ê Sûrîye ûsn tewrê ci bîyî.

Konferans de qirkerdişê cinîyan ê afganan û êzidîyan, xoverdayîşê cinîyan û rayîrê çareserîya meseleyanê cinîyan ameyî nîqaşkerdene.

Konferans de hertim bale ameye antene ser ke KJK pê hemleya xo paştî dana cinîyanê Şingal û Afganîstanî. 

Netîcenameyê konferansî de nê birî ameyî girewtene:

''-Vera şîdet, îstîsmarê serê cinîyan wa têkoşîn bêro kerdene. 

-Cinîyî vera tehlukeyanê ke medyaya dîjîtale de qewimîyenê wa bêrê hişyarkerdene.

-Wa sloganê 'Jin, Jiyan, Azadî' bêro vilakerdene.

-3yê Tebaxe wa biba roja şinasnayîşê heqan û kulturê êzidîyan.

-Ganî qirkerdişê vera cinîyan zî sey jenosîdî bişinasîyê.

-Seba haştî û aramîya Rojhelatê Mîyanênî û Afrîkaya Vakure ganî xîretê cinîyan bêrê paştîdayene, sûc û qirkerdişê vera cinîyan teşhîr bibê û rayaumûmîye de bêrê parekerdene.

-Seba pawitişê kultur, dîn û nasnameyanê cîyayan ê cinîyan wa xebatî bêrê kerdene.

-Wa aqîbetê pêro cinîyan ê vînîbîyayeyan bêrê eşkerakerdene.

-Polîtîkayê dewleta tirke ya îşxalkere wa bêrê teşhîrkerdene, wa dewleta tirke pêro Sûrîye ra xo apey bigêra.

-Serê dinya de seba cinîyan wa têgêrayîşêk bêro ronayene û konfederalîzmê cinîyan bêro awankerdene.

-Seba wedaritişê tecrîdê vera Rayberê Şarê Kurdî Abdullah Ocalanî xebatî bêrê kerdene.''