Têgêrayîşê Cinîyan ê Azadan ê Kurdîstanî  (RJAK), bajarê Silêmanî yê Başûrê Kurdîstanî de bi eşkerayîya çapemenîye takvîmê çalakîyan ê 25ê Teşrîna Peyêne Roja Têkoşînê Vera Şîdetê Serê Cinîyan eşkera kerd.

Eşkerayîya ke hetê endama RJAKî Şeyma Nebîl ra ameye wendene de nê ameyî vatene: “Ma sey wezîfeyê ehleqî vera her qeyde zulm, şîdet û qirkerdişê serê cinîyan ê. Na herre de hinî her cînayeto ke binê nameyê 'namûs'î de yeno kerdene, hêrişê terorî, bombarduman û her qeyde qirkerdiş û îşxalî amrmanc keno. Çunke heme nê çalakîyî bi eynî zîhnîyetî yenê kerdene. No zîhnîyet zî vera cinîyan û merdimîye yo.”

RJAKî hişmendkerdişê komelî zî sey wezîfeyêkî name kerd û vat, “Silêmanî, Kerkûk, Ranya, Germiyan û wextê akerdişê mekteban de ma do semedê domanan semîneran bikerê. Reyna do aktîvîteyê ma yê sey rayraşîyayîş,eşkerayî vilakerdişê vilawekan bêrê kerdene.”