9ê çeleyê 2013î de paytextê Fransa Paris de Sakîne Cansiz, Fîdane Dogan û Leyla Şaylemez ameybî qetilkerdene. 

Qirkerdişê Sakîne Cansiza ke ronayoxa PKKyî bîye dejêko pîl da pêro şerwananê azadîye, şar û têkoşeran.

Şehîdan Armance Goşkar, Nûda Sason û Çayan Koçgirîyî zî o çax rojnuşteyanê xo de qala Sakîne Cansiz kerdbî.

Rojnuşteyê Şehîde Armance Goşkar: ''Xeberan de yeno vatene ke 3 cinîyê şorişgerî ameyê kiştene. Paris de ke çimê modernîteya camêrdan o, hîrê cinîyê çêrî ameyê qetilkerdene. Vajîyeno ke Sara, Rojbîne û Leyla qetil kerdê. Ti zî qetil kerda embaze Sara! Hêrsê îxanet û namerdîye narey da to ro. Sereyê to yê sereberz û rûmêtînî ra dîyayo to ro. Bultenê xeberan vanê cinîyêka çêre ameya qetilkerdene. Şorişgêr, hemra, xoverdayoxa azade û cinîyêka rike ameya kiştene. Cinîya ke emrê xo dayo koyan û şeran. 

Wexto ke ti ciwîyayêne seba cinîyan û şarêkî peyê xo de mîrasêko pîl verda. Çend cinîyî estê ke wexto ke ciwîyayêne bîyê efsane? Çend cinîyî estê ke cuya înan tim şer o? Têkoşînê to pirdêko xorin awan kerd. Hêzo ke no kerd hêzê Apogîrî bi. To hêzê Apogîrîye û cewherê cinîbîyayîşî ardî yew ca. To embazîya ke layîqê Hemla, Hayrî, Mazlûm, Zîlane, Egîd û Bêrîtanan o awan kerd. Vera cuya koletîye to şerêko giran kerd. To têkoşînê azadîye bi eşqêkê xorinî ard ca. Coka ti ameya hedefkerdene. Ê wazenê ma kokanê ma ra biabirnê. Qijikê pîsî vanê 'Verî cinîyan qetil bikerê.' Sara, Rojbîne û Leyla bedelê ney ê.

Rojnuşteyê Şehîd Çayan Koçgirî: Êlula 2012î. Ez Gever de leşkerîya tirkan kena. Hêzanê gerîlayan Çewlîg û Erzirom de çalakîyêke kerde, 110 leşkerê ke şîyêne yewinanê xo ameyê kiştene. Gerîlayan Şemzînan visto binê kontrolê xo. Bêhelîkopteran leşkerî nêeşkenê şorê Orêmar. Kîrpîyêk erşawîya. Seba ke ez şora yewina xo kewta rayîr. Ez şina, çira şina uja? Cayê ke ez şina ci senîn o? Ez xerîbê nê cayan bîya. Serrêke derbaz bîye, ez hema zî tîya de ya.

9ê çeleyê 2013î. Televîzyon de xeberî vanê Sakîne Cansiz, Leyla Şaylemez û Fîdane Dogan ameyê qetilkerdene. Zerrîya mi bi lezî gulp dayêne. Hêrsî ra ez dana sineyê xo ro. Ez Sakîne Cansiz nêşinasnena, mi verî ne no name eşnawito ne zî mi a dîya. Çira ez hende hêrs bena? Fransa de kurdî weriştê we. Ez Gever de mîyanê artêşa tirke de ya la ez ha hetê ê şarî de ya. Nê fortografê înan venga mi danê, mi rê vanê çi karê to uca de esto Velî? Rîyê serê fotografan mi rê vanê 'Çi gureyê to uca de esto, çêr be Velî.' Çar serrî vîyartî. Leşkerîye ra ez remaya ver bi şorişgêrîye. Mi her ke embaze Sakîne şinasnaya dejaya. Mi kitabê ci wendî, embazan mi rê qala aye kerde. Ez soz dana to, ez do rayîrê to ser ra şora.

Rojnuşteyê Nûda Sason: Merdim to rê vajo têkoşer bes nêkeno. To kulturê homatîye rê dewam kerd û cinîyêka rayber a xurt a. Wexto ke reya verême mi embaze Sara dîye ez zaf bikelecan bîya. La hûyayîşê embaze Sara hende samîmî û aram bîye ke seke ma rew ra yewbînî şinasnayêne ma verar şîyê yewbînan. Vera hêzê aye kam bibîyêne tersayêne. Embaze Sara bi fikr û vateyê xo lapatêk eşt rîyê dişmenî ro. Aye her nefesê xo de dişmen kişt, a çêr û qehramenêk bîye. Coka ê kesê ke cinîya serewedartoxe ya Dêrsimî ra tersayêne reyna rezaletêko bîn nêqewimîyo kewtî dewre. La înan çîyêk xo vîr a kerdbî. Ê bi seserran o wazenê cinîyan bikişê  la cinîyî newe ra ganî benê. Ma do sey Sara, Mazlûm û Delale biciwîyê.''