Hemşaredara Karazî Nazliere nêameye veradayene
Roniştişê dewaya Hemşaredara Karazî ya tepişte Rojda Nazlier ame dîyene. Roniştiş de qerarê dewamê tepiştişî ame dayene.
Roniştişê dewaya Hemşaredara Karazî ya tepişte Rojda Nazlier ame dîyene. Roniştiş de qerarê dewamê tepiştişî ame dayene.
Derheqê Hemşaredara Karazî Rojda Nazlier a ke wezîfe ra ameye dûrvistene û tepiştene bi îdîaya ''endamîya rêxistine'' dewa ameyebî akerdene. Roniştişo yewîn ê dewaya Mehkema Cezaya Girane ya Amedî de ame dîyene.
Nazliera ke Zîndanê Kayserî de yena tepiştene, bi rayîrê SEGBÎSî beşdara roniştişî bîye. Roniştiş de avûkat Resul Temur, Bawer Mizrak û Dîyar Çetedîr zî amade bîyî. Wekîlanê HDPyî Remzîye Tosun, Musa Farisogullari û Merale Daniş Beştaş, hemserekanê HDPyî yê Amedî keye û embazanê Nazliere zî dewa teqîb kerde.
Nazliere vat: "Ez raşt û adîlane nêvînena ke kîlometreyan dûrî ra bi rayîrê SEGBÎSî pawitişê xo bikera. 2 şahîdanê ke vera mi îfade da 2 serrî verê cû ameyî girewtene û qanûnê poşmanîye ra fayde kerd. Şahîdan 7 mengan ra dima derheqê mi de îfade da ke no detpêkê planê tayînkerdişê qeyûmî yo."
Îtîrafker Ercan Tucî yo ke Zîndanê Xarpêtî ra tewrê roniştişî bi îdîa kerd ke o di rey şîyo keyeyê Nazliere. Avûkat Bawer Mizrakî zî waşt ke îtîrafker rê tay çîyî persî la hetê mehkeme ra ame astengkerdene. Avûkatê Nazliere û wekîlî hetê serekê mehkeme ra salone ra ameyî vetene.
Badê mabênêk heyetê mehkeme qerarê dewamê tepiştişê Nazliere girewt û roniştiş 20ê nîsane rê ame taloqkerdene.