Endama Konseya Rayberdişî ya KJKyî Zerîne Rûken ANFyî rê tay ercnayîşî kerdî.

Qiseykerdişê Zerîne Rûken ra tay noqtayê girîngî wina yê:

''Ez şexsê embaze Zîlane (Zeynepe Kinaci) de pêro şehîdanê ma bi rêz û minetî yad ken a. Ewro koyanê Kurdîstanî de xeta Zîlane, Sema û Gulanan yena teqîbkerdene. Gerîlayê YJA-Starî û HPGyî bi ruhê nînan şer kenê û danê dişmenî ro. Ewro ma vînenê ke şexsê Zîlane de felsefeya Apogîre cayê xo dîyo. Ewro bi hezaran cinîyî benê Zîlane û şer kenê. Embaze Zîlane 30ê hezîrana 1996î de vera suîkastê serê Rayberîye tewir mojna û çalakîya xo ya fedayîye kerde. Embaze Zîlane bi na çalakîya xo verê cinîyan ê kurdan û artêşbîyayîşê cinîyan akerd. Aye kesayetê cinîya azade temsîl kerd.

Ewro têgêrayîşê ma yê cinîyan bi Zîlanbîyayîşî ver bi azadîye şino. Gerîlayê cinîyî bi felsefeya 'Jin, Jiyan, Azadî' tarîxî  nusenê. Ewro xêrê têkoşînê Zîlane, Sema, Gulane, Gulçîya, Leyla, Raperîne û Zîlane Pepuleyan ra şorişê cinîyan berz beno. 

Rayber Apo vera tecrîdê giran û mutleqî xoverdayîşê xo rê dewam keno. A raşte Rayber Apoyî pê paradîgmaya xo ya ekolojîke, femînîste û demokratîke tecrîd pûç kerdo. Her ke fikrê ey vila benê felsefeya Jin, Jiyan, Azadî û şorişê cinîyan zî aver şinê. Ma no serewedaritişê cinîyan ê Rojhelatê Kurdîstanî û Îranî de dî.

Rejîmê AKP-MHPyî yê faşîstî seba ke estbîyayîşê xo rê dewam bikero wextê weçînayîşan de zî hêrişanê xo rê dewam kerd. La xoverdayîşê gerîlayan ver de çok şi erdî ro. Gerîlayî nêverdenê ke dişmen erdê ma de cabido xo û vera hêrişan bi xurtî û bi fedayîtîya Zîlane têkoşîn keno. Ma zî ganî bi terzê fedayî bibê Zîlane, Hemleya Wextê Azadîye û Wextê Cinîyan berz bikerê û Rayber Apoyî azad bikerê.

1ê hezîrane ra heta 30ê hezîrane bi seyan fedayîyê ma yê qehremanî, şehîdê ma yê qehremanî est ê. Sere de şehîdê hezîrane û Zîlan-Zeynep Kinaci, Sema Yuce, Gulan-Fîlîz Yerlîkaya, Şaristan Asmîn, Ş. Zîlan Pepûle, Hejar Zozan, Bêrîvan Zîlan, Raperîn Amed, Leyla Van, Gulçiya Gabar, Leyla Sorxwîn de ez pêro şehîdanê ma bi rêz û minetî yad kena. Ma seba ke felsefeya Jin, Jiyan, Azadî vilayê her cayî bikerê, azadîya Rayber Apoyî bîyarê ca û qesasê şehîdanê xo bigêrê ganî têkoşînî berz bikerê.''