Keyeyê welatperwerê rojawanijî Guloyî ra dadîya şehîdan Necahe Guloya ke xeylêk reyî Sakîne Cansiz dîbî ANFyî rê bi wesîleya serrgêra 9. ya Qirkerdişê Parisî qisey kerd.

Necahe Gulo da zanayene ke Sakîne Cansiz serranê 90an ra dima derbazê Rojawanê Kurdîstanî bîya, Rojawan de bi giranê karê cinîyan kerdî û vat: ''O çax ez zî newe tewra  karanê komelî bibîya. Dima ke fikrê Rayber Apoyî vila bi cinîyî zêdêr tewrê têgêrayîşê azadîye bîyî. Sakîne Cansiz hêz û moral da cinîyanê Rojawanî. Hetê perwerdekerdişê cinîyan ra rolê Sakîne Cansiz zî zaf bîyî.

Reya verêne kanûna 1997î de kampe de mi Sakîne dîye. O çax Rayber Ocalanî her kes kampe de kom kerd û ey derheqê nêzdîbîyayîşanê camêrdan, xorêxistinkerdişî, perwerdekerdiş û nasnayîşê cinîyan de qisey kerd. Rayber Ocalanî o çax Sakîne Cansiz û tay kesnaê bînan ra derheqê cinîyan û xoverdayîş de kitabêk waşt. Sakîne bi tewirê xo yê zîndanî, seba cinîyan ruhêko xoverdayox awan kerdbi. Coka embaza Ocalanî bîye, wayîra tarîxêkê xoverdayoxî û tewirê heybetînî bîye.

Kes pê aye nêeşkayêne. Bi rayîrê tewir û fikrê xo aye merdimî perwerde kerdêne. Şehîde Sakîne têna sembola cinîyan ê kurdan nê sembola pêro cinîyanê dinya ya. Şexsê Sakîne Cansiz, Fîdane Dogan û Leyla Şaylemez de xîret ame kerdene ke pêro cinîyî bêrê qetilkerdene. Kiştoxê înan hema nêameyî muhakemekerdene. Hetê bînî ra dewleta tirke her roje hêrişê cinîyan, zîndanan û Kurdîstanî kena.

Dewleta tirke bi şehîdkerdişê Sakîne waşt cinîyan ê kurdan bitersna. No qirkerdiş verê çimanê pêro dinya de ame kerdene. Ma do tim peyê pêro şehîdanê xo de bibê û qesasê înan bigêrê.''