9ê çeleyê 2013î de Paris de Sakîne Cansiz, Fîdane Dogan û Leyla Şaylemez hetê endamê MÎTî Omer Guneyî ra ameybî qetilkerdene. Tehqîqatê qirkerdişî çend serrî yo dewam keno. Tek vergumanê qirkerdişî Omer Guney zî verî ke mehkeme dest pêbikera xo kiştbi. Mehkemeya Fransa tim qirkerdiş peygoş kerd. La nêrazîbîyayîşê vera tewrê Fransa hema zî dewam kenê. 

Sendîkaya Solidairesî ya Fransa bi eşkerayîyêke venga pêro kedkaran da ke 9ê çeleyî de tewrê çalakîyanê protestoyê qirkerdişî bibê. Sendîka vist vîrî ke 3 cinîyê kurdî hetê kiştoxê MÎTî ra qeyil bîyê la 8 serran ra nata waştişê edaletî nêno caardene. Sendîka bale ante ser ke Serekkomarê Fransa Macron û ê verênî François Hollandeyî çend reyî Erdoganî reyde pêvînayîşî kerdî la babete qet nêkerde rojdem.

Sendîka ard ziwan ke ganî Fransa menfaatanê xo nêvisna vernîya edaletî û pare kerd ke Tirkîya hema zî Rojawan, Karabag, Lîbya û Başûrê Kurdîstanî de qirkerdişan kena.

Sendîka da zanayene ke seba ke edalet bêro caardene ganî PKK sey muxatab bêro qebulkerdene û lîsteya terorî ra bêro vetene.

Sendîka venga pêro kedkar û merdiman da ke 9ê çeleyê 2021î de Paris Gare du Nord de pê kortejan tewrê çalakîyan bibê. Sendîka vat: ''Seba edaletî ma 9ê çeleyî de Paris de bibê.''