Cinîyê ke Kurdîstan de pê reng û vengê xo vejîyî kuçeyan 8ê Adere pîroz kerd û vat ê do çirey verê zextan de milê xo çewt nêkerê. Cinîyan polîtîkayê hêrişkarî yê îqtîdarî protesto kerdî û azadîya Rayberê Şarê Kurdî Abdullah Ocalanî waşte.
Bi wesîleya 8ê Adare Roja Cinîyan ê Kedkaran a Dinya sey xeylêk bajaranê Kurdîstanî Sêrt û qezaya Silopî ya Şirnexî, Nisêbînê Mêrdînî,Colemêrg, Riha û Semsûr de zî cinîyî meydanan de bî. Çalakîyê ke serkeşîya Meclîsê Cinîyan ê HDPyî û TJA de ameyî organîzekerdene de cinîyî ameyî têhet û bi slogana ''Cinî cuye azadîye'' qîrayî.
Silopî
Silopî de wekîlê HDPyî Merale Daniş Beştaş, Nûrane Îmîr, Dayîkê Haştîye û bi seyan cinîyî tewrê çalakîye bîyî. Mîtîngo ke kincanê herêmîyan ê cinîyan bale ante xo ser de azadîya Ocalanî ameye waştene.
Sêrt
Çalakîya Sêrt de zî vengê cinîyan ra kuçeyî zimayî. Vervatoxa HDPyî Ebru Gunaya ke tewrê mîtîngî bîye vat ê do tecrîdê serê Rayberê Şarê Kurdî Abdullah Ocalanî bişikinê.
Colemêrg
Colemêrg de bi tewrbîyayîşê Wekîla HDPyî ya Riha Ayşe Surucu, Dayîkanê Haştîye û bi seyan cinîyan 8ê Adare ame pîrozkerdene. Cinîyan tilîlîyan û sloganan waştişê azadîye ard ziwan.
Nisêbîn
Nisêbînê Mêrdînî de zî cinîyan semedê pîrozkerdişê roja xo aktîvîteyêke organîze kerde. Wekîla HDPyî Dîlane Dîrayet Taşdemîra ke tîya qisey kerd bale ante têkoşînê cinîyan ser û vat: Êyê ke wazenê ma biestere ewro bi xo esterîyenê.
