Goreyê agahîyanê ke ameyê girewtene taxa Camîkebîrî ya qezaya Sêwrege ya Riha de dadîya hîrê domanan Esma Kalenderlî hetê camêrd Murat Otuşo ke tira cîya bibî ra ameye qetilkerdene.

Dîya zanayene ke serebût Bulvarê Ataturkî de qewimîyayo û Otuşî pê çeke cinîye birîndar kerda. Esma wedarîyaye Nêweşxaneyê Dewlete la rixmê pêro xîretan zî dinyaya xo bedilnaye.

Eşkera bi ke kiştox Murat Otuş zîndanî ra newe tehlîye bîyo. Otuş ame destbendkerdene.

Serranê peyênan de hêrişê vera cinîyan zêdîyayî. Goreyê raporê Platformê 'Ma Do Verê Kişîyayîşê Cinîyan Bigêrê' temmuze de 25 cinîyî ameyê qetilkerdene û 9 cinîyan zî bi hawayêkê şikdarî dinyaya xo bedilnaya.