Bajarê Silêmanî yê Başûrê Kurdîstanî de bi şîarê ''Têkoşîno hempar ê cinîyan garangîya qedînayîşê qirkerdişan o'' bi tewrbîyayîşê cinîyan ê êzidî, kakayî, zerdeştî, feylî û mesihi Otêla Dewa de  konferansê cinîyan ame kerdene.

Sere de Silêmanî, Kekuk, Halebçe û Ranya, bajaranê cîya cîyayan ê Kurdîstanî ra temsîlkarê xeylêk dezgehan û şervanê YJŞyî tewrê konferansî bîyî. Cinîyê ke tewrê konferansî bîyî bi kincanê xo yê bawerî û kulturê neteweyî mojnenê bale ante xo ser.

Vervatoxa TAJÊ Rihame Hiço ke qiseykerdişê akerdişî kerd qurbanê Fermanê 3ê Tebaxe yad kerdî û vat: ''Femande bi hezaran kesî ameyî qetilkerdene,. Êyê ke o wext semedê pawitişê Şingalî wezîfedar bî, çi heyf ke şar însafê çeteyan ra verda û remayî. Ferman de 3 hezar û 500 cinîyî ameyî remnayene û bazaranê koleyan de ameyî rotene. Aqibetê hezar û 400 cinîyan hema nîno zanyene. Seba ke ferman sey qirkerdişî ame naskerdene ma keyfweş ê la no nêvejeno. Ganî Iraq fermanî sey qirkerdişî nas bikero û selahîyetdarê ke bîyê sebebê fermanî, înan ra hesab biperso.

Bi hezaran êzidîyî teslîm nêbîyî û peynîya cuyeya xo arde. Tay cinîyan destê xo birnayî, tayînan zî xo kaşan ra eşt war. Bi hezaran qehremanê nê qirkerdişî est ê. Xeylêk cinîyî bîyî sembolê îradeyî. 19 cinîyan ke bawerîya xo canêverdaye Musul de aşma Remezanî de ganî ganî ameyî vêşnayene. Ma zanî ma senî yew îmtîhanî ra ravîyarenê. Coka nika serkêşîya YJŞyî de pawitişê ma est o. Roje çîn a ke Rojhelatê Mîyanênî de cinîyî raştê hêrişî merê. Di serrî verî rojêke cinîyê afganî nişka însafê çeteyanê Talîbanî rê ameyî caverdayene. Ma xoverdayîşê cinîyan ê afganan selam kenê. Ma cinîyî do çeteyanê DAÎŞî û hemkaranê înan ra hesab bipersê û cuya azade ronê.''

Bi nameyê Îdareyê Xoserî yê Rojawanî, KJAR û cinîyan ê êzidî, kakayî, zerdeştî, feylî û mesihi zî qiseykerdişî ameyî kerdene. Qisekerdişan de hêrişê vera cinîyan ameyî vîrardene û bale ameye antene muhîmîya xopawitişî û têkoşînê hemparî ser.

Konferan de qirkerdiş û polîtîkayê vera grûb û bawerîyanê  cîya cîyayan ê bawerî ameyî niqaşkerdene. Pawitişê kultur, ziwan û bawerîyan de bale ameye antene rolê cinîyan ser û muhîmîya têkoşînê hemparî sero ame vindertene. Badê panelan konferans bi slogana  ‘Jin, Jiyan, Azadî’ qedîya .

Dima ra peynînameyê konferasnî ame pare kerdene. Peynîname de mesajê rêxistinbîyayîşî û pîlkerdişê têkoşînê vera dewleta tirke ameyî dayene û ame waştene ke wa qirkerdişê Şingalî bêro naskerdene û qetilkarî û paştgêrê înan bêrê muhakemekerdene.  Cinîyan waşt wa warê hewayî yê Iraqî dewleta tirke rê bêro qefilnayene.