Endama Meclîsê Cinîyan ê HDPyî Songule Şarkli derheqê Konferansê Cinîyan ê Partîya Çep a Keske de qisey kerd. 

Songule ard ziwan ke weçînayîşan ra dima înan şarî reyde kombîyayîşî kerdî, rexneyî girewtî û pêşnîyazî arê dayî. Songule vat: ''Bi nê hawayî ma konferansê xo kerd. Konferans de xeylêk nîqaşê cidî û tesbîtê raştî ameyî kerdene. Ma hêvî kenê ke çareserkerdişê meseleyan de ma do îradeyêkê hîna cidîyî bimojnê.

 Îtîfaqê Kede û Azadîye xeylêk rexneyî girewtbî, bi taybetî babeta namzetan de. Reyna paştdayîşî namzedîya Kiliçdarogluyî zî xeylêk ame rexnekerdene. Nê rexneyî seba mi zî raşt ê, ez zî wina fikirîyena. Reyna meseleyê ma yê awanîyî ameyî rexnekerdene. Xûlasa pratîk de ma xo cewabê nê rexneyan bidê.''

Songule Şarkli îfade kerd ke hem rêxistinîya cinîyan de hem zî karê pêroyî yê partîye de qelsîye est a û vat: ''Ma do na mesele zî çareser bikerê. Seba xurtkerdişî ganî ma karêkê aktîfî bikerê. Ma do rêxistinîya cinîyan a xurte awan bikerê û mîyanê partîye de serdestîya camêrdan zî qels bikerê. Warê ma teng benê û tay çîyî cinîyan partîya ma ra dûrî kena. Tedbîrê ney afernayîşê rêxistinîya cinîyan a xurt a.''