Komîteya Dîplomasî ya TAJÊ bi wesîleya serrgêra Fermanê 3yê Tebaxa 2014î ê welatanê ke jenosîdê vera êzidîyan qebul kerdo, rê mektubêka akerde şawite, venga nînan da ke seba muhakemekerdişê cergan û şirîkanê înan ê gemarinan wa gama raştikêne bierzê.

Mektube de dîya zanayene ke hema zî aqîbetê 3 hezar merdimî eşkera nîyê. TAJÊ pare kerd ke girîng o ke 13 welatan Fermanê 3yê Tebaxe sey 'Jenosîdê Êzidîyan' qebul kerdo û mektube de ca dayî waştişanê xo.

Mektube de Komîteya Dîplomasî ya TAJê wina venga dewletan û komelê mîyanneteweyî da û nê waştişî rêz kerdî:

''-Wa qirkerdişê DAÎŞî yê vera êzidîyan sey jenosîdî bêro qebulkerdene.

-Mesuldarê nê qirkerdişî wa hesab bidê; hêverî cergê DAÎŞî û hemkarê înan PDK û dewleta tirke wa hesab bidê. Ganî Hukmatê Başûrê Kurdîstanî zî seba ke Şingal nêpawito hesab bido.

-Îdareyê Xoserî yê Rojawanî bire daye ke cerganê DAÎŞî muhakeme bikero. Ma sey êzidîyan paştî danê ney. Welatê ke Fermanê 3yê Tebaxe sey jenosîdî qebul kenê wa paştî bidê na bire û na babete de erk û mesuldarîyanê xo bikerê.

-Peymana Şingalî ya 9ê Teşrîna Verêne dewamê fermanî ya û ma na qebul nêkenê. Ganî tehlukeyê na peymane bêrê dîyene û na peymane nêra qebulkerdene.

-Hêrişê hewayî yê dewleta tirke wa bêrê vindarnayene.

-Seba newe ra awankerdişê Şingalî wa paştî bêra dayene xebatan.

-Seba ke doman û cinîyê ke destê DAÎŞî de yê bêrê azadkerdene wa xebatî bêrê kerdene.

-Ma paştî danê xebatanê xelisnayîşî yê QSDyî. Ma venga rayaumûmîya mîyanneteweyî danê ke seba ke destê DAÎŞî ra esîrê êzidîyî bêrê xelisnayene paştî bida nê xebatanê QSDyî.''