Vervatoxa Meclîsê Cinîyan ê HDPyî Dîlane Dîrayet Taşdemîr bînaya Rêxistina HDPyî ya Amedî de derheqê rojdemê sîyasî yê cinîyan de kombîyayîşê çapemenîye serûber kerd.

Qirkerdişê Roboskî

''Keyeyê Roboskî 8 serr ê ke verê goranê domananê xo de pabeyê edaletî yê. Komeleya Roboskî ameye girewtene, heykelê Roboskî ame raşanayene. Wazenê ke Qirkerdişê Roboskî bêro vîrkerdene. La ma do qet Qirkerdişê Roboskî xo vîr ra nêkê. Ma kesanê ke Qirkerdişê Roboskî de ameyî qetilkerdene bi rêzdarî yad kenê.

Elîf Kisa

Elîf Kisa ya 70 serre hetê îqtîdarê AKPyî ra amete tepiştene. Elîf Kisa nêweş a û têna haştîye waşte. Bi tepiştişê aye ma rîyê AKPyî yê faşîstî reyna dî. Ma venga Wezaretê Edaletî û îqtîdarê AKPyî danê ke Elîf Kisa cade bêra verdayene."

Tecrîd

21 serran ra nata Îmrali de tecrîdêko girankerde esto. Îqtîdarî polîtîkaya tecrîdî ra hêz girewt û nika wazeno ke nê tecrîdî pêro welatî de vila bikê. No caardişê tecrîd sey rejîmê tecrîdî dewam keno.

Şîdetê Vera Cinîyan

2019 de vera cinîyan bi hawayêkê giranî sîyasetê şîdet ame kerdene. îqtîdarê AKPyî vera cinîyan cîyatîya cinsî kerde. 5 serranê peyênan de 1 mîlyon û 15 hezar 337 cinîyî maruzê şîdetî bîyî. 1890 cinîyî ameyî qetilkerdene ke înan ra 94ê ci binê pawitişê dewlete de ameyî qetilkerdene. Goreyê doneyanê Torra Têkoşînê Vera Şîdetê Serê Cinîyan a Amedî mabênê menganê Adare-Hezîrana 2019î de 954 cinîyî seba şîdetî muracatê înan kerd. No îtîdar vera şîdetî têkoşîn nêkeno. Eqsê ci şîdet keno zêde. 2019 de pêro çalakîyê cinîyan ameyî qedexekerdene. Aktîvîstê TJA seba ke şîdetê vera cinîyan protesto kerd ameyî destbendkerdene, maruzê cigêrayîşê zûtî mendî û bi tacîzî gef ro înan ame wendene.Tacîzî û îşkenceyî bîyî zêde. 2 rojnamegerî seba ke gêrenê rastîye ameyî destbendkerdene û nezaret de îşkence bi înan amekerdene.

Qirkerdişo Sîyasî

Serra 2015î ra nata operasyonanê vera parîya ma de 15 hezar û 427 kesî ameyî destbendkerdene û 3 hezar û 640 kesî ameyî tepiştene. Her 3 kesanê înan ra yew zî cinîye bîye. 4 serranê peyênan de 5 hezar cinîyî ameyî destbendkerdene û hezar cinîyî ameyî tepiştene. Şaredarîyanê ma rê qeyûmî ameyî tayînkerdene û hemşaredarê ma sey esîr ameyî girewtene.

Dişmenê Rojawanî: AKP û IŞÎD

Rojhelatê Mîyanênî de 2 hêzî dişmenîya Rojawanî kenê ke pêro dinya heyranê sîstemê Rojawanî ya: AKP û DAÎŞ. Ma zî dişmenîya înan seyr kenê. Cinîyan, û şaranê Tirkîya rê zî bedelê nê şerî dayîye dayene.

Multecîyî

Serra 2011î de şerê Zûrîya ra zaf multecîyî ameyî Tirkîya. Her roje heqê nê multecîyan yenê binpaykerdene, cinîyê multecîyî yenê tacîzkerdene. Multecîyî sey hacetê sîyasî yenê dîyene û înan ser o bazarîye yena kerdene.

Xoverdayîş Bi Zêde

Cinîyî rayberîya têkoşînê komelkîye kenê. Cinîyê Kurdîstanî û Tirkîya vera şerî dewlete û şîdetê camêrdan vindertî û înan bedelê pîlî dayî. La têkoşîn û xoverdayîş ra fek vera nêda. Xoverdayîş û têkoşîn serra 2019î de bîyî zêde. Ewro kuçeyan de, keyeyan de, meydanan de, kar de, zîndanan de ma vera şîdetê camêrdan xo ver danê û rayberîya têkoşînan kenê. Ma do dewam bikê ke têkoşînê xo bikê. Heta ke HDP û cinîyî estbê faşîzm mecbur o ke bin bikewo."