Meclîsê Cinîyan ê Rojawanê Kurdîstanî 14ê hezîrana 2019î de ronîya. 52 têgêrayîşê cinîyan ê kurd, ereb, sûryan, armenî, keldan, tirkmen û çerkezan binê serbanê meclîsî de cagênê. Meclîs seba ameyoxê Sûrîye vernîyazê qanûnêkî awan keno.

Endama Koordînasyonê Meclîsê Cinîyan ê Rojawanî Jîyane Hisên cewab da persanê ANFyî. 

Jîyane Hisên îfade kerd ke rêxistinîya Yewîya Starî û Kongreya Starî ra dima cinîyan her warî de rolêkê girîngî ardî ca û vat: ''Dima ke tay herêmê îşxalkerdeyî zî xelisîyayî hînî ma rê meclîsêko hempar lazim bi. Cinîyan û têgêrayîşê cinîyan serkêşîya Kongreya Starî de 2019 de gamêka pîle eşte û xeylêk rêxistin û herêmî zîyaret kerdî. Cinîyan nê zîyaretan de fikrê meclîsî pare kerd. Kongreya Ronîyayîşî ya Meclîsê Cinîyan ê Rojawanî 14ê hezîrana 2019î de şaristanê Amûdê de ameye kerdene. Tîya de rêziknameyê Meclîsê Cinîyan qebul bi. 52 rêxistinanê cinîyan bi nê hawayî Meclîsê Cinîyan awan kerd.

Her rêxistine ra 2 temsîlkarî mîyanê meclîsî de est ê. Reyna her herême ra temsîlkarêke est a. Mîyanê Îdareyê Xoserî de temsîlkarê cinîyan û temsîlkarê rêxistinanê cinîyan ê ciwanan cagênê. Meclîs de verî di komîteyî ameyî awankerdene; Komîteya Qanûnanê Cinîyan û Komîteya Qanûnê Bingeyî. Dima zî Platformê Çalakîye yê Rêxistinanê Cinîyan ê Rojawanî ame awankerdene.''

Jîyane Hisên ard ziwan ke Meclîsê Cinîyan keno ke xo biresno pêro cinîyanê dinya û tecrubeyanê xo nînan de pare bikero. Jîyane da zanayene ke hêrişê vera herême û ambargoyî bi xirabî tesîrê karanê Meclîsî kenê û vat: ''Ma kenê ke kêmasîyanê xo çareser bikerê. Ma hêvîdar ê ke kongreya xo ya bîne de nê kêmasîyan bi lezî werte ra wedarnê.''