Têgêrayîşê Cinîyan ê Azadan (TJA) derheqê cezaya qedexeyê pêvînayîşî ya vera Rayberê Şarê Kurdî Abdullah Ocalanî de eşkerayîyêke daye.

Eşkerayîye de ame vatene ke tecrîdkerdişê Ocalanî tesîrê pêro komelî, bi taybetî tesîrê cinîyan ê kurdan keno. TJA vat: ''Faşîzmê AKP-MHPyî tecrîdî sey hacetê îşkenceyî vera Birêz ocalanî şuxilneno. Şexsê Birêz Ocalanî de wazeno ke têkoşînê azadîye yê cinîyan û hemratîya cinîyan bifatisno. Tecrîdî reyde bêhuqûqîye girane bîye. Ma venga Komîteya Vergirewtişê Îşkenceyî ya Konseya Ewropa (CPT) danê ke Îmrali zîyaret bikera û mesuldarîyanê xo wa bîyara ca.

Têkoşînê vera tecrîdî xoverdayîşê vera faşîzmî yo. Êyê ke wazenê têkoşînê azadîya cinîyan bifatisnê û xeta xelisîyayîşê cinîyan asteng bikerê vera înan rayîrê têkoşînî şiknayîşê tecrîdî yo. Tecrîd do çin bibo, cinîyî do ser bikewê. Têkoşînê azadîya cinîyan do ser bikewo.''