Têgêrayîşê Cinîyan ê Azadan (TJA) TJA Wan û Şirnex  de startê aktîvîteyanê 25ê Teşrîna Peyêne Roja Têkoşînê Vera Şîdetê Serê Cinîyan da.

Parka Birca Belekî ya qezaya Cizîre ya Şirnexî de çalakîye ameye kerdene. Aktîvîste TJA, endamê Meclîsê Dayîkanê Haştîye, îdarekarê HEDEPî yê bajar û qezayan tewrê ci bîyî.  Eşkerayîye hetê aktîvîsta TJA Songule Kuçuk ra ameye wendene.

Songule Kuçuk vat, ''Bi polîtîkaya bêcezakerdişî paştî dîyena zîhnîyetê nêrî. Sere de tacîz, tecawuz û şero taybet heme hêrişê cînsî bi paştdayîşê îqtîdarî yenê kerdene.  Îqtîdarî herinda vergirewtişê şîdetê serê cinîyan, hêrişkaran teşvîk keno.  Hêrişkar û kiştoxê cinîyan û domanan bi serbestveradayîşî yenê xelatkerdene. Ma qerarê hukmê ke dişmenê cinîyan û komelî yo nêşinasnenê.

Îqtîdarê ke wazenê verê têkoşînê cinîyan bigêrê polîtîkaya xo ya dişmenîya vera komel û cinîyan Îmrali de bi tecrîdê serê Birêz Ocalanî daye destpêkerdene. Pîya bi xorîkerdişê tecrîdî problemê komelkî zî zafêr bîyî. Ma cinîyî zanê ke tecrîd vera paradîgmaya azadîye yê Birêz Ocalanî yeno kerdene. Ma reyna vanê; Sere de meseleya kurdan adresê çareserî  yê kaos û şerê Rojhelatê Mîyanênî Birêz Ocalan o.''

Programê 25ê Teşrîna Peyêne yê Şirnex û qezayanê ci wina yo:

 * 20ê Teşrîna Peyêne  Qileban de têhetameyîşê cinîyan.

* 21ê Teşrîna Peyêne Hezex’ de çalakîya rêzila more.

* 22ê Teşrîna Peyêne Silopiya de Bazarê Kedan Cinîyan de panel.

* 24ê Teşrîna Peyêne Şirnex de xebatê taxe.

Wan

TAJ Wan de zî Parka Dostîye ya Esenyurt-Tuşba de bi eşkerayîyêke startê çalakîyan da. Wekîla HEDEPî Gulderene Varli nê vatî: ''Îqtîdarê AKPyî 21 serrî yo bi hezaran cinîyî qetil kerdî. Polîs û çawişê pîsporê ke tecawuz, tacîz û qirkerdişê cinîyan ra yenê destbendkerdene berê peyênî yê edlîye ra vejîyenê teber.  Nê bedenî yê ma yê, nê kuçeyî, warê cuye yê ma yê.  Ma do têkoşînê xo bidomnê.''