Têgêrayîşê Cinîyan ê Kurdan ê Ewropa (TJK-E) pare kerd ke serrgêra Qirkerdişê Parisî yê 9ê Çeleyî de her cayê Ewropa de ê do verê Konsolosxaneyanê Fransa de çalakîyî bêrê kerdene û TJK-E vengdayîşê tewrbîyayîşî kerd.

Eşkerayîya TJK-E wina ya: "Ma sergêra 7. ya Qirkerdişê Parisî de yê ke rayberanê Têgêrayîşanê Azadîye yê Kurdan û Têgêrayîşê Cinîyan ra Sakîne Cansiz (Sara), rayberanê dîplomasîya cinîyan a kurdan Fidane Dogan (Rojbîne) û embaze Leyla Şaylemez (Ronahî) ameyî qetilkerdene. Roja qetilkerdişê înan ra nata cinîyî vejîyenê meydanan û edalet wazenê. Bi dokumentan eşkera bi ke berpirsîyarê nê qirkerdişî dewleta tirke û MÎT ê.

Mehkemeyê Fransa nêeşkîyayî vera nê qirkerdişî tewirêkê eşkera bimojnê. Ma wazenê venga Fransa bikê; bêvengîya şima hemkarîya şima ya bi nê qirkerdişî ya.

Sey her serre emser zî serrgêra Qirkerdişê Parisî de ma do verê Konsolosxaneyanê Fransa de waştişê edaletî bikerê. Bi vatişê 'Bêcezatîya 7 serran rê hînî bes o' ma do venga hukmatê Fransa bikerê ke tewirêk bimojno. Sere de cinîyanê kurdan ma venga terefgîranê azadîye û edaletî danê ke seba şermezarkerdişê Qirkerdişê Parisî yê 9ê Çeleyî roja pancşemeyî ma verê Konsolosxaneyanê Fransa de tewrê çalakîyan bibê. Heman wextî de tewrê çalakîyanê merkezîyan ê 11ê çeleyî yê Parisî bibê û kiştoxan û hemkaran ra hesab bipersê."