10ê teşrîna verêne de tewr tay 74 merkezanê dinya de bi heman wextî Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' dîyabî destpêkerdene. TJK-E bi eşkerayîyêke da zanayene ke ê zî tewrê hemle bîyê.

TJK-E eşkerayîya xo de pare kerd ke bi na hemle cewabêko tewr raşt ame dayene serrgêra Komployê Mîyanneteweyîyî. TJK-E îfade kerd ke Rayberê Şarê Kurdî û PKKyî 50 serran de seba azadîya cinîyan û kurdan têkoşînêko pîl kerdo û bedelê pîlî dayê. 

TJK-E vat: ''Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' armanc kena ke tecrîdê Îmraliyî bişikna û Rayber Apoyî azad bikera. Azadîya Rayber Apoyî zî do meseleya kurdan çareser bikera û Rojhelatê Mîyanênî demokratîk bikera. Ewro pêro dinya paradîgmaya ekolojîke, azadîgîrîya cinîyan û demokratîke ya Rayber Apoyî ra hêvî kena. 

Ma sey TJK-E wayîrê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' vejîyenê û îdîa kenê ke do na hemle ser bivisnê. Seba ney zî çi bikewo milê ma, ma do bikerê. Hedefanê ma yê tewr girîngan ra yew zî no yo ke ma do fikran û paradîgmaya Rayber Apoyî pêro cinîyan û şaran de vila bikerê û sîstemê Îmraliyî bi hêzê rêxistinkerdeyî bin bivisnê.

Çarçewa na hemle de ma do 21ê teşrîna verêne de şaristanê Dusseldorfî yê Almanya de bi şîarê 'Azadîye do ser bikewa' forumêkî virazê. Dostê ma yê enternasyonelî, rêxistinê cinîyan û dezgehê ma zî do tewrê nê forumî bibê. Ma venga pêro cinîyan zî danê ke wa tewrê forumî bibê.''