Wekîla HDPyî Remzîye Tosun serrgêra 7. ya Qirkerdişê Parisî yo ke 3 cinîyê şorişgêrî yê kurdî Paris de ameyî qetilkerdene ser o ANF reyde  qisey kerd û ard ziwan ke bi Qirkerdişê Parisî vera pêro cinîyan hêriş ame kerdene. Tosune no qirkerdiş şermezar kerd, cinîyê şorişgêrî yad kerdî.

Tosune vat ke polîtîkaya bêcezaverdayîş Kurdistan û Tirkîya de roje bi roje giranêr benê û mojna ke na rewşe bi giranî bena semedê zêdebîyayîşê kiştişê cinîyan.Tosune bale ante ser ke qetilkerdişê hîrê cinîyanê şorişêran ra dima Silopî de Sêvê Demîr, Pakîze Nayir û Fatma Uyar ameyî qetilkerdene û dima zî Hevrîne Xelef ameye kiştene. Tosune vat ke her qirkerdiş beno semedê qirkerdişanê neweyan.

Tosune vat: "Qetilkerdişê nê cinîyan mojnenê ke ê cinîyanê têkoşeran ra tersenê. Polîtîkayê dewlete dişmenîye cinîyan kenê û cinîyan qels kenê. Qirkerdişê Parisî bêceza ameye verdene, nê zî verê polîtîkayê vera cinîyan kerdî zêdêr. Ma wazenê koştoxê Sakîne, Ekîn Wan, Dayîka Taybet bêrê cezakerdene. Eke kiştoxê înan biameyêne cezakerdene Sêvê, Hevrîne û ê bînî nêameyêne qetilkerdene. Ganî no baş bêro zanayene ke ma neferê Sakîne û Sêvêyan ê. Ma do têkoşînê xo dewam bikerê ke vengê cinîyan her ca de berz bibê. Se beno wa bibo ma do kiştoxan ra hesab bipersê. Ganî pêro cinîyî paştî bidê yewbînan û nê qetilkerdişan dima bê."