Pinare Gultekîn par şaristanê Mugla yê Tirkîya de hetê camêrd Cemal Metîn Avciyî ra bi hawayêkê barbarî amebî kiştene. Mehkemeya tirkan 'tehrîkî' ra cezaya Avciyî kêmînaye û 2 kesê ke hetkarîya Avciyî kerdbî vera dayî.

Endama Platformê 'Ma do Verê Kişîyayîşê Cinîyan Bigêrê' (KCDP) Tuana Gezer derheqê dewaya cînayetê Pinare Gultekîn de ANFyî rê qisey kerd.

Tuana Gencer vist vîrî ke Pinare Gultekîn bi hawayêkê barbarî amebî qetilkerdene la mehkeme 'halê holî' û 'tehrîkî' ra cezaya 23 serran daye kiştoxî. Gencere vat: ''Eke Peymana Îstanbulî dewre de bibîyêne 2 kesanê bînan zî do ceza biwerdêne. Dewaya cînayetê Ayşe Tugba Arslana ke 23 reyî gerreyê camêrdî kerdbî, cezaya kiştoxê ey 'tehrîkê neheqî' ra amebî kêmkerdene. No tehrîko neheq camêrdan paweno. Kiştoxî seba ke ney ra îstîfade bikerê seyci îfadeyan danê. Nê kêmîkerdişê cezayan cînayetanê cinîyan kenê meşrû. Na bire cuya pêro cinîyanê nê welatî visnena binê tehlukeyî.

No kiştox Cemal Metîn Avci tewr tay 10 serran ra dima do vera bidîyo. Nê welatî de kiştoxî bi rehetî mîyanê ma de gêrenê. La cinîyî vera raştê tepiştiş, destbendkerdişî û hêrişan yenê. Ma do tim dewaya Peymana Îstanbulî teqîb bikerê, dewayanê şîdetê vera cinîyan teqîb bikerê, merganê şikdaran eşkera bikerê, raporanê cînayetanê cinîyan eşkera bikerê û bi nê hawayî têkoşînî rê dewam bikerê. Mumkîn nîyo ke pê hoka ewnîyayîşî ya serdestîya camêrdan cînayetê cinîyan biqedê. La ma pê têkoşînê xo verê nê cînayetan bigêrê.''