Meclîsê Cinîyan ê Partîya Têdûştîye û Demokrasîyî ya Şaran (HEDEP) Merkezê Partîya Demokratîke ya Şaran (HDP) de kom bi. Xeylêk cinîyî terwrê kombîyayîşî bîyî. Hemsereka Pêroyî ya HEDEPî Tulaye Hatimogullari verê kombîyayîşî derheqê rojdemî de eşkerayîye daye. Qiseykerdişê Hatimogullari ra qismêk wina yo: 

"Wextê hazirîya kongreya ma de çi heyf ke hêrişê Îsraîlî yê vera Fîlîstînî resa yewna merhale û şer giran bi. Mumkun nîyo ke şerê vera Gazze bêro qebulkerdene. Nê şerî de ruh û bedenê cinîyan bênê letelawere. Çi heyf ke tarîxî ra nata şeran de  tecawuzo sîstematîk vera bedenê cinîyan sey metodêkî yeno şuxulnayene. Eynî wextî de vera Rojawanî zî hêriş yeno kerdene. Heme warê sîvîlî dîyenî bombayan ver û cayê hewcedarîyanê esasîyan yenê hedefgirewtene. Tirkîya çîyo ke Fîlîstînî rê benê qebul nêkena la eynî çîyan vera Rojawanî kena. Gazze de çîyê ke qewimîyenî, Tirkîya heman çîyî  Efrîn de kerdî. Rojhelatê Mîyanênî de di birînê giranî est ê, yew meseleya kurdan yew zî meseleya Fîslîtîn a. Heta ke nê wird meseleyî bi rayîrê demokrasî çareser mebê, herême rê rehet çîn o. Ganî cade hêrişê vera Rojawan û Fîlîstînî bêrê vindarnayene. Ma veng danê heme cinîyan ê dinya; ma eşkenê sînoran birijnê, hêzê xo bikerê yew û na gonî vindarnê.

Birêz Abdullah Ocalan 24 serrî yo binê tecrîdê giran de yo û 32 aşmî yo tira xabere nîna girewtene. Çîyo winayên hema çirey rejîmanê otorîteran de zî nêameyo vînayene. Seba ke sere de meseleya kurdan, meseleya heqan bêro çareserkerdene ganî tecrîd cade bêro wedaritene û Birêz Ocalan bireso azadîya xo ya fîzîkîye. No sere de waştişê şarê kurdî, waştişê şarê herême yo.

Ganî ma sey cinîyan ê tirkîyayijan destê têgêrayîşê cinîyan ê kurdan tepişê û verê têkoşînê haştîye abikerê. Îqtîdarê Tirkîya keno ke heqanê cinîyan ê ke bi keda pîle ameyî destfîayene, destê înan ra bîgêro. Tena serra 2023yî de 323 cinî hetê camêrdan ra ameyî qetilkerdene. Guneyê nê cinîyan milê hukmatî de yo. Krîzê ekonîmîkî xorî beno. Şar nêeşkeno îdareyê xo bikero. Feqîrîye ra zî tewr zaf cinîyî dej acanê. Bedelê veşanîye zî cinîyî danê. Hinî keye, hega, fabrîka û atolyeyan ra vengê ‘Ez wayîrê keda xo vejîyena’ bêno berz.

Ma do vîjnayîşê cayî de şaredarîyanê xo qeyûmî ra peyser bîgêrê û şaredarîyanê neweyan zî bîfînê dest. Ma têna semedê îqtîdarî rê  bidê vînîkerdene sîyaset nêkenê. Waştişê ma o yo ke ma pîya îdare bikerê. Na çarçewa de Amed, Mêrdîn, Wan û Îstanbul de ma do atolyeyanê cinîyan bikerê. Nê atolyeyan de ma do  pîya bi cinîyan stratejîya xo ya modelê îdareyê cayî bewlî bikerê. Ma do Rayîrê Hîrêyinî de îtîfaq û paştdayîşê cinîyan xurtêr bikerê û zixma bimanê. inkey wextê paştdayîş, rêxistinbîyayîş û averşîyayîş o. Sere de meclîsê ma yê cinîyan ma ber bi ber, kuçe bi kuçe, mehla bi mehla xo rêxistin bikerê. Zîhnîyeto ke vano 'Şirê keye têna werd virazê û domanan bîyarê dinya' ma do vera ci rêxistinbîyayîşê xo yê cayî xurtêr bikerê. ”