Meclîsê Cinîyan ê DBPyî raporê atolyeyanê xo yê ''Vera şerê taybetî têhetameyîşê cinîyan'' yê ke 3 mengî yo yenê rayraberdene, banê partî yê Çewlîgî bi kombîyayîşêkî eşkera kerd.

Hemsereka Pêroya ya DBPyî Çîgdeme Kiliçgun Uçar, Vervatoxa Meclîsê Cinîyan ê DBPyî Bêrîvane Bahçeci, aktîvîstê TJA tewrê kombîyayîşî bîyî. 

Hemsereka Pêroya ya DBPyî Çîgdeme Kiliçgun Uçar ke kombîyayîş de qisey kerd bale ante şerê taybetî yo ke Kurdîstan de yeno rayraberdene ser û nê vatî: ''Koyê ma ameyî bombardumankerdene, darê ma ameyî birnayene, çemê ma ameyî leyminkerdene, xoza eynî wextî de vîrê ma ya. Xoza ma ser HES û JESî viraştî. Çîyê ke binê awe de mendî ê zî vîrê ma yê.  Waştişê şerê taybetî o yo ke şarê kurdî bêvîr û bêwayîr biverdo.

Kurdîstan de vêşanîye û feqîrîye est a. Sebebo verên ê nê dewlete herinda haştîye de polîtîkaya şerî vîjnaye. Nê şerî de dejo tewr pîl cinîyan ant. Leşker û polîsê ke yenê Kurdîstan têna wezîfeyê xo nêkenê binê nameyê 'heskerdiş'î de  semedê 'wardayîşê' cinîyan ê ciwanan yenê. Ciwanan ancenê mîyanê madeyê narkotîkî. Dewlete çirey azadîya cinîyan nêwazena. Zana ke eke cinî bibi hîşyar zaf çî bedilnenî. Vera heme zextan cinîyê kurdan tim payan ser ê. Ma vanê wa Birêz Ocalan bibo serbest ke meseleyê bêrê çareserkerdene  ê vanê ney Ma sey cinîyan tim vengê xo vet, ma do pêro pîya vera zulmê dewlete vanê ney.''