Endama Partîya Şorişgêre Burc Çubuk a ke ANFyî rê qisey kerd vat krîzê ekonomîkî hîna zaf cinîyan ser o tesîr keno û bale ante têkoşînê hemparî ser.

Çubuke bale ante  zehmetîyanê ke cinîyî anece ser û vat: ‘‘Her hîrê cinîyan ra yewe bêkar a û cinîyî bi destmizê kêmî xebityene. Xora verê krîzê ekonomîkî zî cinîyan destmizo seypê nêgirewtêne. Bê sîgorta, bê temînatî bi destmizê zaf zaf kêmî xebityayenê. Keda ke keye de nîna vînayene pîyase de zî bêqiymet a.  Faşîzm wazeno ke cinîyan keyeyan de heps bikero û bi keda cinîyan payra bimano. Badê krîzî cinîyî hîna zaf  şertanê xiraban de xebityenê. Hîna zaf xebityenê û hîna kemî qezenc kenê. 

Semedê cinîyan xora ekonomî tim krîz de bi. Cinîyî bi xo pere qezenc bikerê zî çew nêşkeno vajo ke kontrol înan de yo. Cinîyî tengayîya girde de yê. Wina fikrêk yeno afernayene ke krîz têna dano camêrdan ro. Bi naye  wina yeno ramojnayene ke wayîrê karî yê esasî camêrd ê. Keda cinîyan têna sey paştdayîşî yena vînayene. Yeno waştine ke cinîyî peyser bişawîyê keye. No çîyo sîstematîk o. Sîstemê kapîtalîzmî keda cinîyan goreyê hewcedarîya xo gêna dest û wina form dano ci.''

Çubuke xeberê xokiştişê komkerdeyî zî vîstî vîrî û vat: ‘‘Nê xeberê winayên şîdetê camêrdan meşrû kenê. Camêrd qerar geno û heme keyeyî pîya bi xo kişeno. No têna bi krîzê ekonomî nêno eşkerakerdene. Merdimanê ke sey aîdê xo vînenî înan zî mirnenê. Nika kesê ke nêeşkenê îdareyê xo bikerê xo kişenê. No halê bêûmidîye ekonomîk û sîyasalkî yo. Xokiştişê cinîyan ê ke her tim zêdîyenî nîna de zî rolê krîzî ya pîya cînsîyetê komelkî esto.  Cinîyan rê rolêk ameyo fasilnayene eke teberê nê rolî bikewo no sey çîyêkê şaşî yeno dîyene. badê xokiştişan bale ancîyena paştdayîşî ser. Goreyê ma paştdayîş têna çîyê destê xo barkerdiş nîyo bê la pîya têkoşîno hempar o. Vera şîdetê camêrd-dewlete bê têkoşînê rêxistinkerdeyî rayîrê ma yo bîn çîn o.''