Vernîyazê serê Qanûnê Awankerdişê Fonê Ciwanan û Keyeyan Meclîs de ame qebulkerdene. Goreyê nê qanûnî Fonê Ciwanan û Keyeyan ê Wezîrîya Malîye û Xazîne do bêro awankerdene. Fono ke vano ke kam bizewijo do 150 hezar lîra kredîya bêfaîze bido ci,  pênaseyê keyeyî goreyê herêman dîyar keno. Fon seba ke verê zewijnayîşê domanan akeno beno sebebê nîqaşan.

Wekîla HEDEPî ya Mûşî Sumeyye Boz derheqê babete de ANFyî rê qisey kerd.

Boze ard ziwan ke bi nê qanûnî îqtîdar ancî keno ke komelî dîzayn bikero û vat: ''Fon sey 'seba xurtkerdişê keyeyî û bernameyanê averberdişê ci' pênase beno ke bi xo no pênase mesele ya.''

Sumeyye Boz vist vîrî ke fon seba ke ciwanê 18-28 serrî teşwîqê zewajî bêrê kerdene ameyo amadekerdene. Boze da zanayene ke fon de yeno vatene ke 'dîyarkerdişê serranê ciwanan goreyê rewşa herêman do bibo.'

Sumeyye Boz vat: ''Bi nê hawayî verê zewijnayîşê domanan yeno akerdene. Kesê ke wazenê nê fonî ra îstîfade bikerê do domanan bizewijnê. Nêbeno ke mezgo kanwaz bi qanûnan bêro xurtkerdene. Bi nê fonî îstîsmarkerdişê domanan do bizêdîyo. Yanî rîskêko pîl est o.''