Meleke Turay (56) qezaya Sûrî ya Amedî de ciwîyena. Meleke destpêk de keyeyê xo vilikî ramitêne, pîl kerdêne la dima aye dest pê rotişê înan kerd. Nika nê vilikî bîyê çimeyê debare yê Meleke. 

Meleka ke her pancşeme Sûr de dezgehê vilikan kena a, ajansê JINNEWSî rê qala karê xo kerde.

Meleke îfade kerd ke ganî cinîyî xo muhtacê camêrdan nêkerê û vat: ''32 serrî verî ma keyeyê xo ard Amedî. Mi dî ke tîya de her kes vilikan weye keno, mi zî dest pêkerd. Destpêk de mi vilikî nêrotêne. Cîrananê mi û vistewreyê mi vilikê mi girewtêne. Dima mi bire daye ke vilikan biroşê. Ez xoza ra, herre ra û daran ra zaf hes kena. Nika daristanê ma yenê vêşnayene. Ma şarêko xizan û bindest ê. Wa çew destê xo nêdo daranê ma ro.'' 

Meleke dîyar kerd ke hişmendîya sîstemê camêrdan kena ke cinîyan ser de serdest biba û îradeyê cinîyan çin bikera. Meleke vat: ''Cinîyî camêrdan ra hîna jîhat û biaqîl ê. Wa cinîyî hetê ekonomîkî ra xo azad bikerê, bixebitê, biwanê û vejîyê teberî.''