Endama Koordînasyonê Komelê Cinîyanê Rojhelatê Kurdîstanî (KJAR) Peymane Vîyan derheqê serewedaritişê Îran û Rojhelatê Kurdîstanî de cewab da persanê ANFyî.

Qiseykerdişê Vîyane ra beşêk wina yo:

''Prosesê serewedaritişî qetilkerdişê Jîna Emînî ra dima dest pêkerd û hema zî dewam keno. Na yew menge de şarê ma bi zelalî no mesaj da ke heta ke azadîye bivisno destî do meydanan terk nêkero. Rejîmê Îranî 43 serrî yo bi hişmendîya nîjadperestî, dînperest, mezhebperest û tecawuzî hêrişê her warê cuye keno. Îran de serdestîya sîstemê camêrdan nêverdena cinîyan nefes bigêra. Qetilkerdişê Jîna Emînî ra ver Merîwane de cinîye Şilêre Resûlî vera hêrişê tecawuzî sere wedarit û komel wayîrê nê qîrayîşî vejîya. Hêrişê vera Şilêre û Jîna hêrişê vera pêro cinîyan û kurdan bi. Nika vera nê hêrişan hêrsêko pîl est o û no hêrs mojneno ke hînî çew nêeşkeno verê cinîyan bigêro. Serkêşîya cinîyan de Rojhelatê Kurdîstanî û Îran de xoverdayîşêko pîl est o. Sloganê 'jin, jiyan, azadî' nê xoverdayîşî de bingeyê rejîmê Îranî lerzneno. Cinîyî û şarî heta ke waştişê înan ê azadîye, demokrasî û têdûştîye nêrê caardene do kuçeyan ra nêşorê.

Şarê Rojhelatê Kurdîstanî cara şorişgêr o. 1979 de wexto ke rejîmê şaxan rijîyabi kurdan rejîmê molayan nêwaştbi. Raşta zî rejîmê molayan rejîmê şaxan ra wetêr zulmker o. 43 serrî yo xora vera nê rejîmî serewedaritişî est bîyî. La reya verêne serewedaritiş hende beno pîlêr. Çunke pêro şarê Îranî wayîrê vengê Rojhelatê Mîyanênî vejîyayî û dormeyê ci de ameyî pêser. Ewro her ca de sloganê 'vengê Kurdîstanî vengê min o berz beno.' Pêro şarê Îranî nê serewedaritişî de ameyoxê xo vînenê. Yanî cinîyî mojnenê ke ê paradîgmaya Rayber Apoyî û ronayîşê konfederalîzmê demokratîkî de qerardar ê.

Rejîmê Îranî keno ke pê şîdet, tepiştiş û destbendkerdişî verê cinî, ciwan û şaran bigêro. Şarî zî bedelan danê la reyna zî kuçeyan veng nêkenê. Eke Îran waştişanê şaran û cinîyan nêaro ca do birijîyo. Artêşa Îranî Besic verdena kuçeyan, Besic zî kuçeyan de qirkerdiş keno. Cinîyî û şarî wazenê nê rejîmê 43 serrî ra bixelisê û nefes bigêrê. Rejîm tehdît, hêrişan rê dewam keno û do nê hêrişan giranêr bikero.

Cinîyî û ciwanî vera ney heta ke waştişanê xo yê azadîye bigêrê binê garantî wa serewedaritişî rê dewam bikerê. Ganî şar, cinî û ciwanî nê prosesî de bi hawayêkê rêxistinkerdeyî têbigêrê. No rejîm faşîst û seksîst o. Wa çalakîkerî formulê 'jin, jiyan, azadî' aver berê. Xerîtaya ma ya rayîrî û armancê ma zî no yo ke wa cinîyî bi azadî û têdûştî biciwîyê. Xora ma do tim goş bidê waştişanê cinîyan. Ma sey KJARî 2018 de projeyê bi 13 madeyan pêşkêş kerd û waşt ke wa rejîmê Îranî goş bido cinîyan, xo bivurno. Ma nê projeyî de israr kenê. Verê ma de mîsalê Rojawanî est o. Şarê Rojhelatê Kurdîstanî xo rê sîstemê Rojawanî esas gêno.

Ma sey KJARî kampanyaya (hemleya) 'Wext Wextê Pawitişê Şorişê Cinîyan o' îlan kerde. Çarçewa na hemle de ma do paştî bidê nê serewedaritişê cinîyan. Ma di serrî verî 'Platformê Pirneteweyan o Demokratîk' ronabi. Ma armanc kenê ke nê platformî zî çarçewa na hemle de hîra bikerê. Bi rayîrê nê platformî ma wazenê ke meseleyan, waştişan û pêşnîyazanê cinîyan ser o vinderê, çareserîyan pêşkêş bikerê. Ganî cinîyê Îranî paştî bidê na kampanya û tede bi akîfî tede cabigêrê. Ma venga pêro cinîyanê Îranî danê ke bêrê ma pîya waştişanê xo bîyarê ca.''