Festîvala Cinîyan  a Zîlane ya 17. emser bi şîarê 'Jin, Jiyan Azadî; Kurdîstanî ra Ver bi Dinya' şaristanê Gelsenkirchenî yê Almanya de 17ê hezîrane de do bêra kerdene. Festîvala emserîne dîyarîya Evîne Goyî yena kerdene.  Endama Têgêrayîşê Cinîyan ê Kurdan ê Ewropa (TJK-E) Nûpele Munzur derheqê festîvale de ANFyî rê qisey kerd û venga pêro cinîyan da ke tewrê festîvale bibê.

Munzure da zanayene ke şehîde Zîlane seba cinîyan manîfesto ya coka Festîvala Zîlane zî zaf girîng a. Munzure vat: ''Festîvala emserîne de zafêr kulturê xoverdayîşî do vernî de bibo. Ma wazenê kulturo ke cinîyan ê serkêşan afernayo hîna zaf biresnê cinîyan û na çarçewe de cinîyan rêxistin bikerê. 

Festîvale de ma esas kerd ke cinîyê çar parçeyanê Kurdîstanî bieşkê xo îfade bikerê. Rojhelatê Kurdîstanî de dima ke Jîna Emînî ameye qetilkerdene têkoşînêkê şorişê cinîyan dest pêkerd û dinya ra vila bi. Têkoşînêkê cinîyan hema zî dewam keno. No şoriş şorişê 'Jin, Jiyan, Azadî' yo. Bernameyê festîvale zî xitabê çar parçeyanê Kurdîstanî keno. Festîvale de seba domanan zî bernameyê surprîzî est ê. 

Bername de xeylêk hunermendê Rojawan û Rojhelatî do vejîyê sehne ser, Vakurê Kurdîstanî ra komî do hunerê xo pêşkêş bikerê. Komanê govende reyde Jin Ma, Mizgîn Tahîr, Kevana Zêrîn, Eylem Aktaş, Beser Şahîn û Fîrmeske do vejîyê sehne ser. Festîvale de felsefeya 'Jin, Jiyan, Azadî' ser o panelêk do bêro kerdene. Kedê destanê cinîyan do bidîyê şinasnayene.''