Parlamentoyê Ewropa roja pancşemeyî Xelata Azadya Fikrî ya Sakharovî daye cinîya ciwan a kurde Jîna Emînî û têgêrayîşê cinîyan ê  “Jin Jiyan Azadî”.

Sereka Parlamentoyê Ewropa Roberta Metsola vist vîrî ke Jîna Emînî 16ê êlula 2022yî hetê polîsanê Îranî ra ameye qetilkerdene û vat, "Na serebûte serkêşîya cinîyan de têgêrayîşêk vet meyda. Slogana azadîye ya ‘Jin Jiyan Azadî’ Îran de bîye qîrayîşêkê têhetameyîşî. Ma sey Parlamentoyê Ewropa paştî danê kesanê ke Îran de semedê azadîye têkoşîn kenê. Ma Xelata Azadya Fikrî ya Sakharovî ya 2023yî danê ke têkoşînê înan bîyarê vîrî."

Jîna Emînî 16ê êlula 2022yî hetê polîsanê ehleqî yê Îranî ra ameye qetilkerdene û dima ra serewedaritişo ke çirey nêameyo vînayene qewimîya.

Xelata Sakharovî pîya bi 50 hezar ewro peynîya her serre Parlamentoyê Ewropa yê Starasbourgî de heyetê pêroyî yê fermî de yena teqdîmkerdene.