Bi vurnayîşê qanûnî Meclîs de ame qebulkerdene ke tepişteyanê ke vera cinî û domanan sûc kerdo, ê bi 'rewşa hole' vera bidîyê. Wekîla Partîya Çep a Keske ya Mêrdînî Bêrîtane Guneş derheqê babete de ANFyî rê qisey kerd.

Guneşe ard ziwan ke îqtîdarê AKPyî herinda ke netêdûştîya cînsîye wedarno hîna giran keno û vat: ''Îqtîdarê AKP-MHPyî keno ke sûcanê vera cinîyan normalîze û meşrû bikero. Qanûnê 'rewşa hole' zî yeno a mana ke îqtîdar herinda astengkerdişê şîdetî de cîyakerîya vera cinîyan wazeno cîyakerîye hîna pîl bikero. Xora wextê îqtîdarê AKPyî de şîdet û qirkerdişê vera cinîyan zêdîyayê. Meclîso nikayên dişmenê cinîyan o. Meclîs pê wedaritişê Peymana Îstanbulî, perwerdeyê karmayî û qanûnê 6284î keno ke cinîyan keyeyan de heps bikero. ''

Guneşe vist vîrî ke tepişteyê edlîyî bi qanûnan yenê veradayene la tepişteyê sîyasîyî zîndan de manenê. Guneşe vat: ''AKP keno ke komelêkê sey xo awan bikero. Nê sîstemê komelî de cinîyî keyeyan ra nêvejîyenê. AKP keno ke cinîyan teberê komelî de war verdo. Bi nê qanûnê neweyî zî yeno kerdene ke kesê ke vera cinî û domanan sûcan kenê wa vera bidîyê û cinîyan ê mexdûran zî bitersê. Eşkera yo mezgê dewlete-camêrdî xîret keno ke komelêkê neweyî, sîstemêkê huqûqî yê neweyî awan bikero. Ma eşkenê vajê ke wextêkê winayênî de yê ke ê wazenê sûcanê vera cinîyan normalîze bikerê, cinîyan komelî ra îzole bikerê.''

Bêrîtane Guneş îfade kerd ke ê sey Partîya Çep a Keske vera burnayîşê qanûnî têkoşîn bikerê û vat: ''Serewedaritişê cinîyan vera tedayanê sîstemê nikayênî pîlêr beno. Cinîyî do kuçe, meydan, keye, Meclîs û her ca de vera sûcan, şîdet û îqtîdarî têkoşînê xo rê dewam bikerê.''