Bi desan şaredarîyanê ke hetê qeyûman ra ameybî desteserkerdene înan ra yewe zî ya qezaya Qilabanî ya Şirnexî ya. Qilaban zî xo hadre keno ke peynîya zordarîye bîyaro. Namzeda HDP’yî ya seba hemşaredarîya Qilabanî Ferîde Yamane vana ke ê bawer ê do bi ser bikewê.

Keyeyê Yamane serranê 1990’an de rîyê qorucîtîya ke înan ser o ameyêne ferzkerdene ra neçar mendî ke koç bikerê û tayê merdimê aye raywanîya koçberîye de cuya xo vîndî kenê. Yamane qalê ê wextî kena, “Ez keyeyêkê welatperwerî ra yena. Hewna ke domane bîya, keyeyê mi rîyê zextanê dewlete ra neçar mend ke koç bikero. Ê sînor ra ravêrtî û şîyî Iraq. Ez tîya merdimanê xo dir menda. Teberê çend rojan ê serre de ez nêeşkena înan bivînî. Dewe de keso ke ez ê dir zewejîyaya, ê keyeyan ra yew o ke qorucutî qebûl nêkerda. Ma rîyê qebûlnêkerdişê qorucîtîye ra koçber bîyî. Wextê raywanîya koçberîye de keyeyê mi ra xeylî kesan cuya xo vîndî kerde. Wextêk ra dima hendî ma nêeşkayêne îdare bikerê û ma agêrayî. Ma tîya mucadeleyê xo domna.”

Yamana ke maya domanêk a, ard ziwan ke a seba ameyoxê domanan tewrê sîyasetî bîya û wazena kemasî û şaşîyanê ke estê bi rayîrê partîya xo bivurno.

Yamane seba karê xo yê şaredarîye vat, “Ma do hemeyê gure û îmkanan seba xizmetê şarî bişuxulnê. Şar do heskerdiş û samîmîyetê ma bivîno. Do waştişanê xo bi asanî ma ra vajo.”