Fermandarîya Qerargehê Merkezê YJA Starî nasnameyê di gerîlayan ê ke 23ê teşrîna peyên a 2021î de Garzan de şehîd bîyî, eşkera kerdî û nê pare kerdî:

“Hemrayê ma Baharîne Deniz û Mizgîne Boran 23ê teşrîya peyên a 2021î de eyaletê Garzanî de şehîd bîyî. Ma sey Fermandarîya Qerargehê Merkezê YJA Starî wird şehîdanê xo bi hurmet û mînetî yad kenê. Sere de keyeyanê hezdaran ê Şêxo û Guçlu yê hemrayanê ma yê şehîdan rê ma pêro şarê Kurdîstanî rê serweşîye wazenê.

Nasnameyê hemrayanê ma yê şehîdan wina yê:

Nameyê Qodî: Baharîne Dêrsîm Name û Peyname: Leyla Şêxo Cayê Bîyayîşî: Heleb Maye-Pî: Hayat– Ahmed Tarîx û Cayê Şehadetî: 23ê Teşrîna Peyên a 2021î / Garzan

 

Nameyê Qodî: Mizgîne Boran Name û Peyname: Emele Guçlu Cayê Bîyayîşî: Anqara Maye-Pî: Hacere – Mustafa Tarîx û Cayê Şehadetî: 23ê Teşrîna Peyên a 2021î / Garzan

Hemraya ma Baharîne sey efrînijêke Heleb de çimanê xo dinya rê akena. Efrîn de pîl mebo zî, pabesteya ziwan û kulturê şarê Efrînî bena pîl. Dişmen çend biwazo şarê Efrînî ercanê ci ra raqilno zî ser nêekewto. Şarê Efrînî tim nasnameyê xo pawit û gama ke hewce kerd tifingê xo girewt vejîya koyanê Kurmanc, Lêlûn û Hawarî û vera celatanê xo bîyo sîper.

Hemraya ma Baharîne 2000 de tewrê sefanê PKKyî bena. Eynî serre de tewrê Yewîya Fedayîyan bena û 22 serrî sey fedayîya serkêşe mîyanê komelê mîlîtananê fedayîyan de rolê xo kay kena.

Hemra Baharîne sey cinîya fedayîye tim wazena koyanê Dêrsimî de gerîlatîye bikero.  Cunke Dêrsim mekanê hemrayan Sara û Zîlane yo.  Nê koyan de bi desan cinîyan ê qehremanan sey Besê û Zarîfe şer kerd.

Hemraya ma Baharîne 2003 de verê xo dana warê Dêrsimî û tîya 8 serrî gerîlatîye kena. Dima ra ravîyerena Başûrê Kurdîstanî Metîna, Zap, Çemço û Xinêrê de gerîlatîya xo rê dewam kena.

Bado ke tecrubeyanê girdan kena pêser, sey Fermandara YJA Starî ya Eyaletê Garzanî  verê xo dana Garzanî.

Garzan de vera polîtîkayanê leyminan ê dişmenî xover dana û şer kena û gerîlayanê HPG û YJA Starî perwerde kena. Vera dişmenî bi hewayêkê qehremankî şer kena û tewrê kerwanê şehîdan bena.

Hemraya ma Mizgîne Boran qezaya Hamana ya Anqara de yena dinya. Haymana Kurdîstanî ra dûrî bo zî a tim sey leteyêkê Kurdîstanî manena. Hemraya ma Mizgîne gama ke Unîversîteya Anqara de beşê felsefe wendêne tewrê Têgêrayîşê Azadîye yê Kurdan bena.

Waranê Garê, Metîna û Heftanînî de manena û 5 serrî tîya wezîfeyanê xo bi serkewtişî ana ca. Hemra Mizgîne 2015 de verê xo dana Vakurê Kurdîstanî û Garzan de ca dana xo. Sey fermandara cinîye vera konseptê îmha û qirkerdişî yê dişmenî şer kena û sey fermandara herême wezîfe gena xo ser.

7 serrî Garzan de manena, xeylêk rey mergî rê rî bi rî manena la tim tewirê xo pawena û  hela tenge de hemrayîye û fermandarîya xo ramojnena. Heta nefesê xo yê peyênî bi hewayêkê qehremankî şer kena û tewrê kerwanê şehîdan bena.

Hemrayê ma Baharîne û Mizgîne yê ke bi fedakarîya pîle şer kerd bîyî sembolê têkoşînê mîlîtanîya PAJK û PKKyî. Fermandarê serkêşî yê mîlîtanîya PAJKî hemrayê ma Baharîne û Mizgîne  bîyî manîfestoyê cuya û têkoşînê ma. Ma serrgêra şehadetê nê hemrayanê xo yê fedayîyan de înan bi hurmet û mînetî yad kenê û soz danê ke ma do têkoşînê înan bidê domnayene û qesasê heme şehîdan bigêrê.”