Fermandarîya Qerargehê Merkezî yê YJA-Starî bi eşkerayîyêke serrgêra şehadetê ci de Fermandare Bêrîtane (Gulnaze Karataş) yad kerde. Eşkerayîye wina ya:

''Ma serra 31. ya şehadetê ci de embaza xo Bêrîtana ke sembola artêşbîyayîşê cinîyan a, bi rêz û minetî yad kenê. Ma soz danê ke bibê layîqê vîrameyîşê aye. Ma pêro şehîdanê teşrîna verêne bi rêzî yad kenê û soz danê ke alaya înan bi serkewtişî koyan de berz bikerê.

Serrê 1990an seba şarê ma û têgêrayîşê ma serrê girîngî bîyî. Şarê ma nê serran de bi serewedaritişê vera faşîzmê kolonyalîstî tewirêko xurt mojna û eşkera kerd ke cuya koletîye qebul nêkeno. Têgêrayîşê ma tewr zaf zî tesîrê cinîyan kerd. Cinîyan nê serran de serkêşîya serewedaritişî kerd, ê verê xo dayî koyan û bîyî hêzê girîngî. Sere de dewleta tirke hêzanê kolonyalîstan no seba xo sey tehlukeyî dî. Coka înan zere û teber de vera têgêrayîşê ma operasyonê tasfîyekerdişî kerdî. Warê leşkerîyî de zî şexsê Bêrîtane de cinîyan ê kurdan vera ney cewabêko xurt da. Bêrîtane herinda ke bikewa destê dişmenî, xo kendalêkî ra eşt war û vera teslîmîyetî cuya azadîye tercîh kerde. Bêrîtane bi tewirê xo tasfîyekerî bêtesîr kerdî. Bêrîtane bîye sembola israrê azadîya cinîyan ê kurdan. Peyê tewirê Bêrîtane de tradîsyonê mîrasê kênayanê Dêrsimî est o ke înan zî teslîmîyet qebul nêkerdbi. No tradîsyonê xoverdayîşî mîrasê Gulbahare, Rindê Xan û Besêyan o. Bêrîtane bîye sembola mîrasê xoverdayîşî ya Sara, Azîme, Besê Anuş û Xanime Yaverkayayan. Bêrîtane bi tewirê xo mojna ke cinîyî her ke şer kenê benê rind û berê cuya rûmetêne akenê. Aye bi tewirê xo qesasê cinîyanê Dêrsimî girewt.

Bêrîtane Xakurkê de bedenê xo kendalî ra eşt û mojna kolonyalîstan ke cinîyê kurdî qetî do teslîm nêbê. Ewro bi hezaran teqîbkerdoxê Bêrîtane refanê YJA-Starî de şer kenê. Çar hetanê Kurdîstanî û Herêmanê Pawitişî yê Medya de serkêşîya YJA-Starî de teqîbkerdoxê Bêrîtane derbanê giranan danê dişmenî ro. Înanê ke Kobanê, Şingal û Mexmûr de cinîyî barbarîya DAÎŞî ra xelisnayê raya Bêrîtane teqîb kerdêne. Nê erjê ke Kobanê, Şingal û Mexmûr de aferîyayî, ewro binê gefanê AKP-MHPyî de yê. Rojawan her roje dîyeno bombayan ver û armanc yeno kerdene ke îradeyê cinîyan bêro teslîmgirewtene. La ma vînenê le serkêşîya Bêrîtane de, bi rengê Sara û Rûkene cewab dîyeno nê hêrişan. 

Ewro xêrê bedelanê pîlan de YJA-Star astêka serkêşîye de têgêreno. Artêşa ma ya cinîyan bena profesyonele. Ma sey cinîyanê YJA-Starî pê bawer ê ke seba cuyêka rûmetên û azade şer lazim o. Sey Bêrîtananê nê çaxî ma venga pêro cinîyan danê ke tewrê şerê ma bê. Vera faşîzmo ke wazeno ma mehkummê mergî bikero, Bêrîtane zerrîya ma de ya, îfadeya ma ya şerî ya, baskê ma ya. Ma do bi rengê Bêrîtane hes bikerê, bi rengê Bêrîtane têbigêrê û biciwîyê.

Ma sey YJA-Starî Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' selam kenê. Ma pê na hemle sereberz ê. Ma na hemle selam kenê û tewrê ci benê. Heta ke Rayber Apoyî azad bikerê û cuyêka rûmetêne biafernê ma do nêvinderê. Her hele de ma do her ca de piro bidê. Ma serra 31. ya şehadetê Bêrîtane de sey hêzanê YJA-Starî cuya azade pîl bikerê û faşîzmî çin bikerê. Serkewtiş do ê cinîyan ê azadan bibo ke bi rengê Bêrîtane xo ver danê.''