Fermandarîya YPJyî bi wesîleya serra neweye mesajêk weşana û vat ma 2020 de têkoşîn girdêr bikerê.

Mesajê YPJyî ra tayî cayî wina yê: Serra 2019î ma bi xoverdyayîşî ravêrna. Serra neweye de ganî ma têkoşînî girdêr bikerê. Ma do bi xoverdayîşê xo yê hemparî serra 2020î semedê heme cinîyan bikerê serra yewbîyayîş û way/bratîye. Slogana Cinî Cuye Azadîye morê xo da serra 2019î ro. Îqtîdaro ke bi zîhnîyetê camêrdî wazeno payra bimano derbêka girde werde. Şexsê DAÎŞî de zîhnîyetê faşîstî vera xoverdayîşê cinîyan vînî kerd û verê têkoşînê cinîyan de çok da. La bi çînkerdişê DAÎŞî çi heyfo ke şer û kaos nêqedîyayî. Dewleta tirke ya îşxalkare hêrişê vera herême de cinîyan bitaybetî hedef gêna. Vera hêrişê qirkerdişî yê îşxalkeran xoverdayîşê şaran rayberîya cinîyan de morê xo da na serre ro.

Xoverdayîşê cinîyan ê Rojawanî heme dinya ra vila bi û her hetê dinya de semedê paştdayîşê Rojawanî çalakîyî ameyî viraştene. Cinîyanê ke nê çalakîyî viraştî ma înan rê spas kenê û înan silam kenê. Tehluke hema dewam keno la nê çalakîyan hêrişî biney kerdî kêmî. Ganî ruho hempar o ke emser vejîya meydan serre neweye de bi nê ruhî têkoşîn bêro xurtkerdene. Ma sey cinîyan ê YPJyî semedê xelisnayîşê cinîyan ma rayîrê têkoşînî vîjna. Emser cinîyan ê dinya paştdayîşo tewr pîl da têgêrayîşê azadîye yê ma. Na çarçewe de ma serra neweye heme cinîyan û şaran rê bimbarek kenê. Ma bi ruhê Xoverdayîşê Anorî heme şehîdanê xo yad kenê û sozê serkewtişî newe kenê.‘‘