Gerîlayanê YJA Star’î koyanê Zagrosan de 8’ê Adare Roja Cinîyan a Mîyanneteweyîye pîroz kerd. Pîya bi fermandarêka Qerargehê Merkezî yê YJA Star’î, fermandarê YJA Star’î Hezîl Ozgure, Berfîn Nurhake, Pelşîn Koçgîrî, Baharîn Kobanê û xeylî gerîlayê cinîyî pîrozkerdişî de ca girewt, pîrozkerdiş bi merasimêkê leşkerîyî yê seba şehîdan dest pêkerd.

Yew fermandaranê YJA Star’î ra Emîne Ercîyese ke merasimî de qisey kerd, vat, hemverê tecrîdî de xoverdayîşêko pîl esto û no xoverdayîş mesuldarîyêka girane dano serê doşanê gerîlayan ê cinîyan.

Ercîyese vat heta ke azadîya fîzîkkîye ya Rayberê Şarê Kurdî Abdullah Ocalanî bi ca bêro do mucadele bi hawayêkê xurtêrî dewam bikero û wina domna: “Ewro 8’ê Adare Roja Cinîyan a Mîyanneteweyîye ya. Naye ra ma 8’ê Adare heme embazan rê pîroz kenê. Ma nê 8’ê Adare koyanê Zagrosan de pîroz kenê. No wayîrê manayêka pîle yo. Verê her çîyî, bi zelalîya Avaşînî, ma tîya ra Îmraliyî rê silaman şirawenê. Ewro serê Rayberîya ma de polîtîkayêka girane ya tecrîdî esta. Ma cinîyî nê vanê; se beno wa bibo, ê çiqas tecrîdî bikerê giran zî, çirey nêeşkenê ma Rayberîye ra aqitnê. Rayberîye ma dir a. Ma do zî bi mucadeleyê xo yo ke ma kerdo xurt Rayberîye reyde bê. Na çarçewaye de ma nê 8’ê Adare Rayberîye rê pîroz kenê.”

1998 de Rayber Apoyî îdeolojîyê azadîya cinî rona. Xelata cinîyan kerde û vat, “Tena 8’ê Adare nê, heme rojî ganî yê cinîyan bê.” A roje ra heme koyanê Kurdistanî de mucadeleyêko pîl yeno dayene. Cinîyî game bi game azadîye bica anê. Ewro Rayberîye ser o tecrîdêko giran esto. Hemverê nê tecrîdî de zî xoverdayîşêko pîl esto. Grevê vêşanîye dewam kenê. Leyla Guvene çalakwanan rê serkêşîye kena. No xoverdayîşê Leyla Guvene îspatê nê yo ke cinîyê Kurdî çiqas pêgirewteyê Rayberîya xo yê. Leyla Guvene bîya sembolê mucadeleyê azadîya cinî. Bi na wesîleye ma koyanê Zagrosan ra bi xasekîya Çarçele xoverdayîşê embaze Leyla pîroz kenê. Bi berzî û serewedartişê Cîloyî ma xoverdayoxanê zîndanan silam kenê. Bi kanîya Govende, ma şarê xo yê ke çar perçeyanê Kurdistanî de, Hewlêr de, Mexmûr de û êyê ke Strasbourg de, Toronto de yê û heme cayanê dinya de xover danê silam kenê. Ma bawer kenê ke ma do nê xoverdayîşî de bi ser bikewê. No xoverdayîş mesuldarîyêka pîle dano doşanê ma gerîlayan ê cinîyan ser. Ma gerîlayê cinîyî, heta ke bi mucadeleyê xo Rayberîye bikerê azad, ma do mucadeleyî xurtêr bikerê û bidê dewamkerdene.  

ADIRÊ AZADÎYE DO HÎNA BIBO BERZ

Koyê Zagrosan tarîx de tim bi xoverdayîşî ameyê bi vîrardene. Tim bîyo halînê azadîye. Şaro Kurd tim koyan de ro azadîya xo gêrayo. Ewro gerîlayan koyanê Zagrosan de mewzîyê xo hîna kerdê saxlem. Heta ke koyan de mucadeleyê gerîlayan estbo, azadî do zîl bido, adirê azadîye berzêr bibo û dewam bikero. Dewleta TC’yî ya kolonyalîste ewro hemverê şarê ma de şerêkê taybetî kena. Her roje vanê, “ma gerîla qedîna”. Ma zî vanê, nê koyî do bê gerîlayan nêmanê. Xeylî kesan vat, ‘ma gerîlayî qedînayî’ la her rey êyê ke qedîyayî ê bi xo bî. Nika nameyê înan tarîx de zî çinyo.

Emser mucadeleyêko pîl ma paweno. Sere de Leyla Guvene heme xoverdayoxî mesuldarîye doşê ma ser o bar kenê. Amacê mucadeleyê emserî azadîya Rayber Apoyî ya. Her helmê ma, her gama ma, her karê ke ma do bikerê seba azadîya Rayberîye yo. Nê bingeyî ser o ma reyna Roşanê 8’ê Adare yê heme hemrayan û cinîyan pîroz kenê.”