Fermandaranê YPJyî Zinarîne Efrîn bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Zinarîne Efrîn vist vîrî ke Rojhelatê Mîyanênî û dinya de şer beno giranêr û nê şerî de hêverî cinîyî yenê hedefkerdene.

Zinarîne Efrîn bale ante hêrişanê dewleta tirke ya îşxalkere yê vera Rojawanî ser û vat: ''Dewleta tirke erd û hewayî ra û bi polîtîkayanê şerê taybetî hêrişê herême kena giranêr. Dewleta tirke kena ke çimê şarî bitersna û şarî bida koçkerdene. Bi taybetî cinîyî hêrişan de yenê qetilkerdene. Cinîyanê Rojawanî hêzê xopawitişî awan kerd û tewirêko biîrade mojna. Coka dewleta tirke bi metodanê şerê gemarinî hêrişê cinîyanê Rojawanî kena.

Efrîn, Serêkanîyê û Girê Sipî de vera cinîyan tecawuz, tacîz, remnayîş û cînayetî yenê kerdene û cinîyî waranê xo ra yenê kerdene. Seba ke çimê komelî biterso serê cinîyan ra mesaj dîyeno. Vera nê kerdişan ganî cinîyî xo rêxistin bikerê û xo bipawê.  Afganîstan, Îran û cayanê bînan ê dinya de zî cinîyî raştê teda û şîdetî yenê. La ewro cinîyê dinya bi şîarê 'Jin, Jiyan, Azadî' her ca de sere wedarnenê. Rojawan de zî cinîyî serkêşîya YPJyî de xo resnenê cepheyê xoverdayîşî.

Şorişê Rojawanî serkêşîya cinîyan de, bi ked, têkoşîn û xoverdayîşê şehîdanê ma yê cinîyan ronîta. Ewro Rojawan de şerê merg û weşûwarmendişî est o. Ganî goreyê ney ma xo rêxistin bikerê. Sey YPJyî ma sey erkê xo heta peynî do cinîyan û komelî bipawê. La pawitişê Şorişê Rojawanî erkê her cinîye yo. Her cinîye ganî mîyanê şorişî de xo şorişî ra mesuldare bivîna. Teyna cinîyê Rojawanî ney ganî cinîyê dinya zî seba destkewteyanê xo Şorişê Rojawanî bipawê. Ganî ma yew bibê.''