Wekîla HDPyî ya Îstanbulî Zuleyha Gulum derheqê hêrişanê îqtîdarê AKP-MHPyî yê vera kurdan de ANFyî rê qisey kerd.

Gulume ard ziwan ke hêrişê vera cinîyan bi hawayêkê sîstematîkî zêdîyenê û vat: ''Hetêk de hêrişê vera destkewteyanê ma, betalkerdişê Peymana Îstanbulî, hetêkê bînî de hêrişê vera têkoşînê cinîyan ê kurdan û femînîstan. Bi destbendkerdiş, tepiştişî îqtîdar keno ke çalakîyanê ma û rêxistinîya ma asteng bikero.''

Gulume operasyonê qirkerdişê sîyasî yê vera TJA vist vîrî û vat: ''Cinîyan rixmê hende teda û hêrişan zî meydanî nêteriknayî. Ê têkoşînê azadîye yê cinîyan ra tersenê û tira aciz ê. Bi taybetî têkoşînê cinîyan ê kurdan ra tersenê. Têkoşînê cinîyan ê kurdan bi sloganê 'jin, jiyan, azadî' pêro dinya de veng vet. Tersê nê sloganî ra îqtîdar hêriş keno. Dosyaya tehqîqatê vera TJA zî raştîyan ra dûrî ya, pê fermanê îqtîdarî ameya amadekerdene.

Ewro Rojhelatê Kurdîstanî û Îran de cinîyî xoverdayîşê xo rê bi xurtî dewam kenê û no xoverdayîş vilayê pêro dinya beno. Seba ke no têkoşîn hetê cinîyan ê kurdan ra yeno vilakerdene îqtîdar hende terseno. Nê hêrişî bi taybetî vera cinîyan ê kurdan yenê kerdene. Bêguman her ke weçînayîş beno nêzdîyêr nê hêrişî zî do giranêr bibê. Ma sey cinîyan dişmenê nê sîstemî yê ke verê cinîyan de asteng o û ma do meydanan meteriknê.''