5 şaristananê Almanya de çalakîyê paştdayîşê Rojawanî

Kurdîstanijî û dostê înan şaristananê Bonn, Frankfurt, Munih û Freiburgî yê Almanya de vejîyayî meydanan, hêrişê qirkerî yê dewleta tirke û cerganê aye yê vera Vakur û Rojhelatê Sûrîye protesto kerdî.

5 şaristananê Almanya de bi çalakîyan wayîrê Rojawanî ame vejîyayayene. Çalakîyan de xoverdayîşê şarê Rojawanê Kurdîstanî yo ke dewam keno ame selamkerdene.

Bremen: Kurdîstanijî û dostê înan ê ke bi vengdayîşê Komîteya Rojawanî Bipawê  ameyî têhet bi rayraşîyayîşêkî paştî da Rojawanî. Rayraşîyayîşî de zaf vilawekî ameyî vilakerdene. Heman wextî de bi sloganan rotişê çekanê Almanya yê seba Tirkîya ame protestokerdene. Rayraşîyayîş bi nawnayîşê verê Parlamentoyê Eyaletî de qedîya.

Bonn: Çalakîye de paştî ame dayene Rojawanî û  xoverdayîşê Rojhelatê Kurdîstanî ame selamkerdene. Kurdîstanijan û dostanê înan hêrişê vera Rojawanî şermezar kerdî û ame vatene ke azadkerdişê Rayberê Şarê Kurdî Abdullah Ocalanî têna çareyêkê Erdogan û Rûhanîyî yo. Çalakîye bi sloganan qedîyaye.

Frankfurt: Verê HBFyî yê Frankfurtî de bi nawnayîşêkî îşxalê dewleta tirke û cerganê aye ame protestokerdene. Çalakîye de sloganê vera şerî ameyî vatene û alayê YPG-YPJyî ameyî berzkerdene.

Munih: Munihî de zî Meclîsê Cinîyan ê Sara û PYDyî standêkê dazanayîşî akerd. Çalakîye de kurdîstanijî û dostê înan wayîrê Rojawanî vejîyayî û standî de zî seba boykotkerdişê malanê Tirkîya zanayîşî ameyî dayene.

Freiburg: Freiburgê Almanya de zî bi nawnayîşêkî hêrişê qirkerî yê dewleta tirke û cerganê aye ameyî protestokerdene. Çalakîye sloganê ''Biciwîyo Xoverdayîşê YPGyî'' û ''Biciwîyo Serek Apo'' ameyî vatene.