Bajaranê Dusseldorf, Stuttgart, Frankfurt û Nurnbergî yê Almanya de semedê azadîya Rayberê Şarê Kurdî Abdullah Ocalanî çalakîyê roniştişî dewam kenê.
Dusseldorf
Çalakîya Dusseldorfî roja çarine xo dima verdaye. Ewro Dortmund û Koln ra kurdîstanijî tewrê çalakîye bîyî. Reyna endamanê ADKH û MLKPyî zî paştî daye çalakîye. Parlementera HDPyî ya verêne Tuba Hezer ke semîrêk da. Hezere bale ante ser ke Ewropa her çîyê Tirkîya rê vana ma ''qerqilîyenê'' û vat: Qerqilîyayîş nêvejeno. Qirkerdişo pîl esto. Tecrîdê vera Abdullah Ocalanî, hêrişê vera HDPyî . Grevê vêşanîye yê zîndanan 90 rojî xo dima verdayî. Ganî welatê Ewropa hînî rewşa xo zelal bikerê. Ewropa ganî paştî medo sîstemê qirkerdişî. DAÎŞo ke heme dinya rê bibi bela pê têkoşîno ke bi fîkranê Rayberê Şarê Kurdî Abdullah Ocalanî dîya verê ci ame girewtene. Merdimîye Abdullah Ocalanî rê deyndar a.''
Hunermendanê TEV ÇANDî Ronî Erez û Narinxan zî bi deyîranê xo reng da çalakîye.
Stuttgart
Çalakîya roniştişî ya Stuttgartî zî ewro hetê 30 endamanê Meclîsê Şarî yê Freiburgî ra ameye dewrgirewtene. Çalakîye de kitabê Ocalanî û vilawekî ameyî vilakerdene. Çalakwana xoverdayîşê Îmrali, Garê û zîndanan selam kerd û mesajê pîlkerdişê têkoşînî dayî.
Frankfurt
Çalakîya nobete ya Frankfurtî zî roja hîrêne de bicoşî dewam kerde. Çalakîye de derheqê fikranê Ocalanî û tecrîdê Îmraliyî de zanayîş ame dayene. Sey heme çalakîyanê bînan tîya zî tecrîd ame şermezarkerdene û semedê pîlkerdişê têkoşînî ame vengdayene.
Nurnberg
Bajarê Nurnbergî de zî bi waştişê azadîya Ocalanî çalakîya xeyma ke vizêr dîyaye destpêkerdene ewro dewam kerde. Çarçewa çalakîye de îmzayê ke do Sekreterîya Pêroyî ya Neteweyanê Yewbîyayeyan rê bêrê şawitene, ameyî arêdayene.