Vera xespkerdişê şaredarîyanê Mêrdîn, Êlih û Xelfetî çalakîyê protestoyî ke Êlih de ameyî destpêkerdene, dewam kenê. Roja 11. ya protestoyan de şar Parka Yilmaz Guneyî de ame têhet. Hemserekê Pêroyî yê DBPyî Çigdeme Kiliçgun Uçar û Keskin Bayindir, wekîlê DEM Partî, aktîvîstê TJA, Meclîsê Dayîkanê Haştîye û heyeto ke Şirnex ra ame tewrê ci bîyî.

Şar bi slogananê “Bijî berxwedana Batmanê”, “Jin, jiyan, azadî”, “Qeyûm talan e berxwedan jiyan e” û “Ma do bi xoverdayîşî ser bikewê ”ver bi Çatrayîrê Basinî rayra şi.

Badê rayraşîyayîşî qiseykerdişî ameyî kerdene. Hemsereka Êlihî Gulîstane Sonuk vat: ''Şarê Êlihî senî ke serranê 90yan de vera  zextî xover da ewro zî xover dano. Serkewtiş nizdî yo. Talankerî ney, şar do ser bikewo.''

Hemsereka Pêroyî ya DBPyî Çigdeme Kiliçgun Uçar vat: ''Îqtîdaro ke xo pê şerî weye keno polîtîkaya qeyûmî fîna dewre. Wextê prosesê muzakere û çareserîye de Brêz Ocalanî rixmê şertanê zehmetan veng, vate û hêzê xo yê çareserîye fîna meydan. Îqtîdaro ke dişmenê edalet û demokrasîyî yo, çareserîye nêwazeno. Eke çareserî wazenê wa tecrîdî wadarê ke fîkrê Brêz Ocalanî biresî şaran. Kam ke nê welatî de raşta demokrasî wazeno wa 17ê teşrîya peyêne  de tewrê mîtîngê ma bibo. Ma vera rejîmê tecrîdî vejîyê meydanan û azadîye biwazê.''