Îşxalkarîya dewleta Tirkî Swêd de ameye şermezarkerdene

Hêrişê îşxalkarîye yê dewleta Tirkî yê verba Vakur û Rojakewtena Sûrîye Swêd de ameyî şermezarkerdene.

Şaristananê Gavle û Uppsala de Kurdistanijî dostanê xo reyde reyna vejîyayê meydanan û înan îşxalkarîya dewleta Tirkî şermezar kerde. Çalakîyan de komelê mîyanneteweyî rê veng ame dayene ke seba ke  dewleta Tirkî erdê Sûrîyera bêra vetene û Vakurê Sûrîye de perayîşê teyarayan bêro qedexekerdene, gamê rastekênî bierze.

Gavle

Kurdistanijî û dostê înan Storatorget de kom bîyî û pankartê verba îşxalkarîya dewleta Tirkî ameyî akerdene.Çalakîye bi vengdayîşê Merkezê Komelo Demokratîkî yê Kurdî de ameye viraştene û Rêxistina Efûyî ya Mîyanneteweyî ra Marîa Palîkîa çalakîye de qisey kerd û vat ke Tirkîya wazena demografîyê Rojawanî bivurne û multecîyanê ke Tirkîya de yê, Rojawan de ca bike. Palîkîa îfade kerd ke Tirkîya sucê şerî kerdî. Endama Meclîsê Şaredarîye yê Partîya Çepe Jîn Akgul Hajo zî da zanayene ke Erdogan seba ke sîstemo hempar çin bike hêrişê Rojawanî kerd. Hajo vist vîrî ke şorişê Rojawanî şorişê cinîye yo û naye ra hêrişê verba Rojawanî zî hêrişê verba cinîyan o û veng da ke her kes wayîrê şorişê Rojawanî bivejîye.
 

Uppsala

Kurdanê ke Sêşeme Meydanê Stora de çalakîye viraşte, şanê Çarşemeyî de zî heman meydan de çalakîye kerde. Çakakîye de Berpirsîyara Têkilîyanê Mîyanneteweyî ya Herêma Uppsala ya Partîya Çepe Yekbûn Alpe meydan de qisey kerd. Alpe waşt ke ambargoyê verba Tirkîya bêrê caardene û Vakurê Sûrîye zî perayîşê teyarayan ê şerî ra bêro qedexekerdene. Çalakîye de seba şermezarkerdişê sucanê şerî yê dewleta Tirkî kerdî, sloganî ameyî vatene.