Fotografkêşo Fransiz Laurence Grangîen fotografanê ke herêmanê şerî de girewtî dano naskerdene. Hunermendo ke Nunrberg de ciwîyeno destpêkê serre de Rojawanê Kurdîstanî de gêrîya û fotografî girewtî. Dima nê fotografî bi nameyê ''Rojawan: Roşnîye û Estbîyayîş'' Merkezê Kulturî û Perwerdeyî yê Sudpunkî yê Şaredarîya Nurnbergî de pêramotişêk de mojnayî.

Fotografan ra yew zî behsê pawitişê xoserî yê cinîyan ê Rojawanî keno. Cinîyêka çekdare bi alaya ''Pawitişê Cinîye'' û posterê Rayberê Şarê Kurdî Abdullah Ocalanî asena. Fotograf reya verêne hetê çapemenîya almanî ra sey hedef ame mojnayene û dima dezgehanê tirkan ê şaristanî û konsolosxaneyê tirkî seba wedaritişê fotografî xîret kerd.

Şaredarîya Nurnbergî xo ver da la sefîrê tirkî yê şaristanî Serdar Denîz şi şaredarîye û Sereka Şaredarîye Ulriche Maly reyde pêvînayîşê kerd. Selahîyedarê tirkî pêvînayîş de fotograf sey ''propagandaya rêxistine'' mojna û fotograf pêramotiş ra ame wedaritene.

Hunermend Laurence Grangîenî îfade kerd ke o vera nê têgêrayîşê şaredarîye şaş mend û vat: "Aslê xo de tedaya konsoloxaneyê tirkî seba mi û pêramotişî sey reklamêk bi. Ganî ez mînetdarê înan biba."