Şehîdê Qirkerdişanê Parisî Sakîne Cansiz, Fîdane Dogan, Leyla Şaylemez, Evîne Goyî, Abdurrahman Kizil û Mîr Perwer şaristanê Stockholmî ya Swêdî de bi merasîmêkî ameyî yadkerdene.

Merasîmo ke hetê Meclîsê Cinîyan ê Amara ra ameyo serûberkerdene xeylêk kurdîstanijî û dostê înan tewrê ci bîyî. Merasîm de nameyê keyeyanê şehîdan ser o Şukrane Amed û Latîf Cebeyî qisey kerd. 

Qiseykerdişan de ame parekerdene ke şehîdî ruhê yewîye awan kenê. Qiseykerdoxan ard ziwan ke bêvengîya hukmatê Fransa ya vera qirkerdişan nêna qebulkerdene.

Aktîvîsta swêdije Stina Beng merasîm de deyîra ke seba Sakîne Cansiz nuşta 'Hevala Sara' vate.

Nameyê TJK-E ser o zî Nûpele Munzur qisey kerd û vat: ''Têkoşînê embaze Sakîne şehadetê aye ra dima bi global. Teqîbkerdoxa aye embaza ma Evîne Goyî wextê amadekarîya yadkerdişanê şehîdan de ameye qetilkerdene. Ma do tim wayîrê erjanê şehîdanê xo vejîyê û bi nê hawayî layîqê înan bibê.''

Peynîya merasîmî de Evîne Akbaş deyîrî vatî.