Brîtanya û Swîsre de şehîdê têkoşînê azadîye ameyî yadkerdene.

Paytextê Brîtanya London de şehîd Erik Scurfield (Kemal)o ke 2yê adara 2015î de Qamişlo de şerê vera cerganê DAÎŞî de şehîd bibi serê gorê xo de ame yadkerdene. Meclîsê Şarê Kurdî, kurdîstanijî û enternasyonalîstî tewrê yadkerdişî bîyî. Serê gorî de gulî ronîyayî û findî ameyî tavistene. 

Ancî London de şehîdê Operasyonê Şorişgêrî yê Zap û Xakurkê yê 2023yî Helmet Şahîn, Memyan Armanc, Welat Serhed û Huseyîn Azad bi merasîmêkî Merkezê Komelê Kurdîstanî de ameyî yadkerdene. Merasîm de sloganê sey "Şehîd Namirin", "Bijî berxwedana gerîla", "Bijî Serok Apo" ameyî vatene û derheqê şehîdan de sînevîzyonêk ame mojnayene.

Şaristanê Turgi yê Swîsre de hîrê şerwanê Meclîsê Leşkerî yê Sûryanîyan ê ke hêrişê dewleta tirke de şehîd bibî bi merasîmêkî ameyî yadkerdene. Merasîm Merkezê Kulturî yê Sûryanîyan de bi beşdarîya xeylêk kesan ame kerdene. Qiseykerdişan de venga hêzanê mîyanneteweyîyan û rayaumûmîya dinya dîya ke wa verê hêrişanê dewleta tirke ya îşxalkere  bigêrê. Merasîm de ame parekerdene ke şarê Rojawanî do tim destkewteyanê xo bipawê û têkoşînî ra fek vera nêdê.