Almanya, Skoçya, Yunanîstan û Fransa de bi aktîvîteyanê cîya cîyayan Şehîdê Azadîye yê Kurdîstanî ameyî yadkerdene. 

Paytextê Skoçya Edinburg de şehîdê Qirkerdişê Parisî Parîsê Sakîne Cansiz (Sara), Leyla Şaylemez (Ronahî, Fîdan Dogan (Rojbîn, Emîne Kara (Evîn Goyî), Abdûrrahman Kizil û M. Şîrîn Aydin (Mîr Perwer) ameyî yadkerdene. Xeylêk kesî tewrê merasîmê yadkerdişî bîyî. Merasîm de ame parekerdene ke dewleta tirke ya îşxalkere vera kurdan polîtîkaya qirkerdişî ana ca û dinya verê nê qirkerdişî de bêveng a.

Paytextê Yunanîstanî Atina de gerîlaya YJA-Starî Jîyane Welata (Jîyane Şahîn) ke 8ê teşrîna peyêne ya 2013î de şehîd bibî serkêşîya TCŞyî de ameye yadkerdene. Keyeyê Jîyane Welat zî tewrê yadkerdişî bi. Yadkerdiş de ame vatene ke ganî vîrameyîşê şehîdan tim bipawîyê. Yadkerdiş bi sloganan qedîya.

Paytextê Fransa Paris de gerîlayê HPGyî Rênas Raperîn (Faîk Aydin) û Amara Ekîn Ceren (ajda Çetîn)  ê ke 2023 de şehîd bîyê ameyî yadkerdene. Merasîmê yadkerdişî de keyeyanê şehîdan vat: ''Ganî ma wayîrê mîrasê şehîdan vejîyê û têkoşînî gir bikerê.'' Merasîm de veng dîya ke Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' wa bêra xurtkerdene. Merasîm bi slogananê sey “Bijî Serok Apo” û “Şehîd namirin” qedîya.

Dortmundê Almanya  de zî serkêşîya têgêrayîşê cinîyan ê kurdan de aktîvîteya yadkerdişê şehîdanê Parisî ameye kerdene. Duisburg û Essenî ra zî şar tewrê aktîvîte bi.