Partîyanê muxalefetî yê Almanya ra Partîya Alternatîfê Seba Almanya (AfD) bi serrnameyê 'Haştîye û azadîye bipawê, îşxalê Tirkîya yê vera Vakurê Sûrîye û Vakurê Iraqî şermezar bikerê' muracatêk kerd.

Muracato ke ANF resayo ci, tede ame vîrvistene ke dewleta tirke 18ê nîsana 2022yî de vera Başûrê Kurdîstanî hêrişê îşxalî dayê destpêkerdene û wina ame vatene:

''Seba nê îşxalî şertê huqûqê mîyanneteweyî munasîb nîyê. Ne hukmatê Iraqî Tirkîya dawetê erdê xo kerdo ne zî vera Tirkîya yew hêriş çin o ke, a goreyê 'pawitişê meşrûyî' têbigêra. No reya verêne nîyo ke Tirkîya peymananê mîyanneteweyîyan binpay kena û hêrişê herêmanê kurdan ê Iraqî kena.''

AfDyî vist vîrî le 2018 û 2019 de dewleta tirke kewtbî erdê Rojawanî û o çax Meclîsê Federalî no sey 'binpaykerdişê huqûqê mîyanneteweyî' pênase kerdo. AfDyî bale ante îşxalê neweyî yê Tirkîya yê vera Sûrîye ser û îfade kerd ke Tirkîya Rojhelatê Mîyanênî de polîtîkaya îşxalî ana ca.

AfDyî da zanayene ke medya û rayaumûmîya Almanya vera hêrişanê Tirkîya bêveng ê û waşt ke seba ke îşxalê Tirkîya biqedo Meclîso Federal wa tedaya Hukmatê Federalî bikero.

Muracatê AfDyî de waştişî wina yê:

''1-Wa hêrişê Tirkîya yê vera vakurê Iraqî bi xurtî bêrê şermezarkerdene.

2-Kesê ke paştî û bira daya nê hêrişan wa vera înan caardişî bêrê kerdene.''

Muracatê AfDyî tehtîlê hamnanî ra dima Meclîs de do bêro nîqaşkerdene û raydayene.