Alamanya de kileya azadîye ya Newroze bîye berz

Xeylî bajaranê Almanya de Kurdistanijî û dostanê înan bi rayraşîyayîşê bişemale viraştî û bi govendan Newroze pîroz kerde.

Bi wesîleya Roşanê Newroze binşewe xeylî bajaranê Almanya de kileya azadîye bîye berze. Kurdistanijan û dostanê înan Newroze pîroz kerd û xoverdayoxê grevê vêşanîye silam kerdî.

HAMBURG: Bajarê Hamburgî yê Almanya de Newroze bicoş ameye pîrozkerdene. Kurdistanijan  û dostanê înan şemaleyî tafînayî û bi sloganan azadîya Ocalanî waşte û xoverdayoxê grevê vêşanîye silam kerdî. Parlamenterê partîya Çepe yê Almanya Martîn Dolzer zî tewrê şayî bi û xoverdayîşê şarê Kurdî silam kerd. Dolzerî vat ke bê Ocalanî mesleya Kurdî nêna çarekerdene û hukmatê Almanya ra waşt ke qedexeyê serê PKK’yî wedaro.

DUISBURG: Bajarê Dusiburg de zî  bi şîarê ‘‘Ma do tecrîdî bişiknê, faşîzmê birijnê, Kurdistanî azad bikerê‘‘ bi paştdayîşê grevê vêşanîye Newroze ameye pîrozkerdene. Mustafa Tuzako ke 68 rojî yo grevê vêşanîye de yo bi tililiyan adirê Newroze tafîna  û şayî bi deyîran û govandan dewam kerde.

STUTTGART: Stuttgart de zî bi şemaleyan rayraşîyayîşêk ame organîzekerdene. Şayîya Newroze de azadîya Ocalanî ameye waştene û xoverdayîşê grevê vêşanîye ame silamkerdene.

AACHEN: Aachen de zî roşanê Newroze bicoş ame pîrozkerdene. Kurdistanijan şexsê Leyla Guvene de bi slogan û tîlîlîyan Newrozê xoverdayoxanê grevê vêşanîye pîroz kerde. Şayî bi dormeyê adirî de govend girewtişî qedîyaye.

SAARBRUCKEN: Saabrucken de zî  kileya azadîye bîye berze. Kurdistanijan bi şemaleyan  Newroze pîroz kerde. Aktîvîte de  hukmatê Almanya ra ame waştene ke qedexeyê PKK’yî wedaro û vengê xoverdayoxanê grevê vêşanîye bieşnawo.

FRANKFURT: Frankfurt de zî adirê Newroze ame wekerdene û govenda  azadîye ameye girewtene. Qiseykerdişan ame  vatene ke waştişê xoverdayoxanê grevê vêşanîyê waştişê ma yo û ganî cade bêro bicaardene.

FREIBURG: Freîburg de zî bi aktîvîteyêk Neroze ameye pîrozkerdene. Biseyan kesî ameyî têhet pîskeneyê adirî girwtî xo dest û bi sloganan meydanê bajarî de rayraşîyayîşêk viraşt. Bado zî adrirê  azadîye ame wekerdene û şayî bi govende qedîyaye.

GIESSEN: Gîessen de şayîya Newroze Zulkuf Gezeno ke semedê wedartişê tecrîdî çalakîya fedaîye virşate, rê ameye dîyarîkerdene.  Şayî de azadîya Ocalanî ameye waştene û xoverdayoxê grevê vêşanîye ameyî silamkerdene.

WUPPERTAL: Wuppertal de zî Kurdistanijî vejîyayî kuçeyan û roşanê xo bicoş pîroz kerd. Qiseykerdişan de ame vatene ke xoverdayoxê grevê vêşanîye biheq ê û bi ruhê Newroze do ser bikewê.

NURNBERG: Nurnberg de zî bi seyan kesî seba pîrozkerdişê Newroze kuçeyan de bî. Kurdistanijan roşanê xo pîroz kerd û paştî daye xoverdayoxanê grevê vêşanîye.

BONN: Bonn de zî bi vengdayîşê Têgêrayîşê Ciwanan, û Cinîyan ê Ciwanan ê Şorişgêrî aktîvîteyêk ameye viraştene.  Merkezê bajarî de adirê Newroze ame wekerdene û heta saetanê ereyî govende ameye girewtene.