Eşkera bi ke agahîyê serê komeleyanê kurdan ê Almanya serra 1994î ra nata bi hawayêkê îlegalî erşawîyenê îstîxbarat û mudirîya asayîşî yê sey Dayîreyê Îdareyî yê Federalî yê Kolnî.

Heta nika agahîyê serê 15 hezar komeleyan erşawîyayî tîya. No metod yeno a mana ke pêro agahîyê serê koçberî û multecîyan yenê qeydkerdene.

2020 de Partîye Çepe bi vernîyazêkî waştbi ke qanûnê teqîbkerdişê multecîyan bêro wedaritene la vernîyaz amebi redkerdene.

Dîya zanayene ke serranê peyênan de derheqê qasê 209 komeleyan de agahîyî erşawîyayê îstîxbaratî. Musteşarê Wezîrîya Karanê Zereyî Stephan Mayerî 2019 de derheqê mesele de eşkerayîyêke dabî û pare kerdbî ke qedexeyê vera PKKyî ra komeleyê kurdan yenê teqîbkerdene. La eşkera bi ke seba teqîbêkê winasênî qerarnameyêk qetî nêameyo dayene.

Wekîlê Partîya Çepe Gokay Akbulutî pers kerdbi ke qerarnameyêko winasên est o yan çin. Wezîrîya Karanê Zereyî zî cewab da û vat: ''Destê ma de qerarnameyêko winasên çin o.''

Hukmatê Almanya menga nîsane de vatbi: ''Agahîyê serê komeleyanê xerîban nêerşawîyenê îstîxbaratê bînan.'' La derheqê na babete de şikê pîlî est ê. Çunke vejîyabi werte ke îstîxbaratê Almanya nê agahîyan çarçewa 'hemkarîya asayîşî' de şaweno dewleta tirke.