Xeylî bajaranê Almanya, Hollanda û Swêdî de şehîdê menga Teşrîna Verêne ameyî yadkerdene.  Aktîvîteyan de şexsê sîyasetmedara Kurde Hevrîn Xelefe û Fermandarê QSD'yî Şivan Rojhatî de şehîdê xoverdayîşê Rojawanî  ameyî yadkerdene.

Mannheîm: Kombîyayîşê yadkerdişî yê şaristanê Mannheîmî beşdarîya Kurdistanijan ê herêma dormeyê Mannheîmî ame viraştene. Salona kombîyayîşî bi fotografanê şehîdan ameye xemilnayene.

Koln: Kombîyayîşê yadkerdişî yê Kolnî hetê KOMAW û meclîsê cinîyan ê eyaletê NRW'yî ra ame viraştene. Kombîyayîş de sînevîzyonêk derheqê şehîdanê menga Teşrîna Verêne de ame mojnayene û temsîlkarê KOMAW'î qisey kerd. Qiseykerdoxî vat ke eke ewro dinya pêro paşt dana Kurdan, no bi sayê şehîdan o Kombîyayîş de Xelîl Xemgîn, Diyar û Memoyî eserê ke seba şehîdan ameyî nuştene, vatî.

Berlîn: Kombîyayîşê yadkerdişê Berlînî de qefleyêko pîl estbi.Qiseykerdoxan bale ante serê barbarîya ke dewleta Tirkî û çeteyê aye Vakur û Rojakewtena Sûrîye de kenê û vat; "Tarîxê têkoşînê azadîye de pê nê kerdişanê xo wazenê ma têkoşînê azadîye ra abigêrê."

Frankfurt: Bajarê Frankfurtî yê Almanya de zî bi aktîvîteyêk şehîdî ameyî vîrardene û sozê xurtkerdişê mucadeleyî ame dayene.

Hîldesheîm: Şaristanê Hîldesheîmî yê Almanya de seba yadkerdişê Fermandarê QSD'yî Şivan Rojhatî (Yûsif Mihemed Salîh Nabî) kombîyayîşêkê yadkerdişî ame viraştene. Şivan Rojahato ke babîyê 6 domanan bîyo, 11'ê Teşrîna Verêna 2019 de Serêkanîyê de xoverdayîşê "Cengê Rûmetê Rojawanî" de şerê verba leşker û çeteyanê dewleta Tirkî ya îşxalkare de şehîd kewtibi. Peynîya zîyaretê serewşîye de Merkezê Komel o Demokratîk ê Kurdan ê Hîldesheîme de kombîyayîşê yadkerdişî ame viraştene. Şexsê Şivan Rojhatî de şehîdê menga Teşrîna Peyêne ameyî yadkerdene.

Arnhem: Şaristanê Arnhemî yê Hollanda de zî bi kombîyayîşêk şehîdê menga Teşrîna Verêne ameyî yadkerdene. Kombîyayîş de xeta xoverdayîşî yê rayberîya Bêrîtane ser ame qiseykerdene. Girîngîya têkoşînê şehîdan ê mabênê têgêrayîşê azadîye de ame îfadekerdene.

Swêd: Paytextê Swêdî Stockholm de zî bi şexsê Berîtane (Gulnaz Karataşe) de şehîdê menga Teşrîna Verêne ameyî vîrardene. Virardiş de xoverdayîşê Rojawanî zî ame silamkerdene.